ԵՐԵՎԱՆ, 12 մայիսի- Sputnik. Այս պահին ՀՀ անվտանգության խորհրդի նիստ է տեղի ունենում։ Տեղեկությունը հայտնում է կառավարության Telegram-ի ալիքը։
«Վարչապետի պաշտոնակատար Նիկոլ Փաշինյանի գլխավորությամբ տեղի է ունենում Անվտանգության խորհրդի նիստ»,–նշված է հաղորդագրության մեջ։
Հաղորդագրության մեջ չի նշվում, թե ինչ է քննարկվում այս ուշ ժամին հրավիրված ԱԽ նիստում, բայց հիշեցնենք, որ դրությունը լարված էր այսօր Սյունիքի Իշխանասար գյուղի հատվածում։
Հիշեցնենք` լրատվամիջոցներում ու սոցկայքերում լուրեր էին տարածվել, թե Սյունիքի մարզի Իշխանասար գյուղի հատվածում թշնամին մարտական գործողություններ է սկսել։
Գորիսի փոխհամայնքապետ Իրինա Յոլյանը Facebook-ում գրել էր, որ թշնամին Իշխանասարի հատվածում պետական սահմանն անցել է և ևս երեք կիլոմետր առաջ եկել դեպի Վերիշեն բնակավայր։
«Հրամանատարն ասաց, որ Ադրբեջանը որևէ ոտնձգություն չի արել». Թագուհի Թովմասյան
ՀՀ ՊՆ մամուլի ծառայությունն էլ հայտնել էր, որ մայիսի 12-ի առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։