ԵՐԵՎԱՆ, 29 ապրիլի – Sputnik․ ՀՀ երրորդ նախագահ Սերժ Սարգսյանի փեսան` Վատիկանում Հայաստանի նախկին դեսպան Միքայել Մինասյանը, չի մասնակցելու առաջիկա արտահերթ խորհրդարանական ընտրություններին։ Facebook-ի իր էջում նա գրառում է արել՝ ընդգծելով, որ հավատարիմ է մնում իր խոստմանը։
«Ես պահում եմ խոստումս և հայտարարում եմ, որ չեմ մասնակցելու սպասվող արտահերթ ընտրություններին։ Իմ այդ որոշումն ունի մի շարք պատճառներ»,- գրում է Մինասյանն ու հերթով թվարկում դրանք։
Նրա կարծիքով՝ ՀՀ վարչապետ Նիկոլի Փաշինյանի գլխավորությամբ ընտրությունների գնալը նշանակում է վերջնականապես ընդունել «Հայաստանի ոչ ժողովրդավար իրականությունը» և խաղի այն կանոնները, որ Փաշինյանն է հաստատել։
Նշում է՝ գիտի, թե իր մասին ինչ են մտածում և խոսում նախկին և ներկա իշխանություններն ու նախկին և ներկա ընդդիմությունները։ Ընդգծում է՝ նրանք նախընտրում են չտեսնել փաստերը, ուստի որոշել է չմտնել այս «ընտրական ցիկլ», որ ապացուցի՝ իր պայքարը պետության, այլ ոչ թե պաշտոնի կամ անձնական շահի համար է։
«Մեկ անգամ ասել եմ, որ դաստիարակված մարդ եմ և գիտեմ հարգել մեծուփոքր՝ ոչ միայն տարիքային, նաև ըստ արաժանիքների։ Եվ այսօր հականիկոլական պայքարին այս կամ այն կերպ մասնակցում են մարդիկ՝ մասնավորապես առաջին, երկրորդ և երրորդ նախագահները, որոնց նկատմամբ, անկախ գաղափարական համաձայնություններից կամ հակասություններից, ունեմ մեծագույն հարգանք և եթե իրենք մտածում են, որ իրենց պայքարի ձևն ավելի էֆեկտիվ է և իրենց ակտիվ ներգրավվածությունը պարտադիր է Հայաստանը փրկելու համար, այդ որոշումը արժանի է հարգանքի»,- նշում է Միքայել Մինասյանը։
Կարևոր է, որ Հայաստանում ընտրությունները լինեն ազատ և օրինական. Փաշինյան
Իր որոշման բոլոր պատճառներն ու հիմնավորումները թվարկելուց հետո էլ ավելացնում է՝ չի գնում ընտրություններին, բայց շարունակում է իր կռիվը։
Միքայել Մինասյանն իր համախոհներին էլ կոչ է անում գնալ ընտրությունների և գիտակցված ընտրություն անել` ձայնը տալով այնպիսի ուժի, որը կբերի խաղաղություն մեր երկրին, հանրային համերաշխություն և լավ ապրելու հույս։
Լինելու են ՀՀ պատմության մեջ ամենավատ ընտրությունները. տեղամասերում կլինեն բախումներ