Ատոմ Մարգարյանի դիտարկմամբ` թերևս լավատեսական սցենար է այն, որ տարեվերջին, ըստ Կենտրոնական բանկի, գնաճը Հայաստանում կվերադառնա կանխատեսված միջակայք։ Ըստ նրա` մեր իրավիճակում ընդհանրապես լավ կլիներ, որ արվեն սցենարային կանխատեսումներ, այսինքն` ինչ պայմանների և գործոնների համադրման դեպքում կարող է այդպիսի ելքային ցուցանիշ լինել։
«Այս տարվա համար կանխատեսված ցուցանիշը չորս +-1,5 տոկոսն է, ինչը բավականաչափ լայն միջակայք է, եթե հաշվի առնենք, որ գնաճը 3–5,5 տոկոսի միջակայքում ընդունելի է։ Հետևաբար` մյուս ցուցանիշները կանխատեսվել են նշված միջակայքի վրա, մասնավորապես` ՀՆԱ–ի աճն, ըստ այդմ, կազմել է 3,2 տոկոս»,– նշեց տնտեսագետը։
Մարգարյանի կարծիքով` այն սպասումները կամ ակնկալիքները, որոնք գների աճի մակարդակի հետ են կապված, թերևս այս պահին զսպողական ազդեցություն ունեն։ Ըստ նրա` գաղտնիք չէ, որ վերջին հինգ–վեց ամիսներին, պատերազմի շրջանից սկսած, փոխարժեքի անկումը բավականաչափ ուժեղ պրեսինգային ազդեցություն է թողել ֆինանսական շուկայի վրա, ինչն էլ, ըստ էության, գնաճային հզոր գործոն է այն իմաստով, որ թանկանում է հատկապես ներկրվող ապրանքը։
Իսկ Հայաստանը ցավոք շարունակում է մնալ ներկրումների վրա նստած երկիր, որոնք շարունակում են մեր մակրոտնտեսական պահանջարկը ձևավորող գործոն լինել` մեծացնելով Հայաստանի կախվածությունն արտաքին շուկաներից։