Դերասան Հայկ Պետրոսյանն ապրիլի 26-ին պատրաստվում է իր հեղինակային երգերի մենահամերգին, որի ժամանակ կներկայացնի հետպատերազմյան ապրումներից ծնված ստեղծագործությունները։
Սթենդ–ափ ներկայացումներով հայտնի արտիստը Sputnik Արմենիայի տաղավարում պատմել է, որ պատերազմից վերադառնալուց հետո չէր կարողանում զգացողություններն ու մտքերը հումորային տեքստերով արտահայտել և որոշեց խոսել հանդիսատեսի հետ երգի լեզվով։
«Հումորը իմ կյանքի անբաժան մասն է, բայց այս պահին չեմ կարողանում հումոր անել։ Հաշվի առնելով , որ ունենք գերիներ, կորցրել ենք հայրենիքի մի հատվածն ու հազարավոր տղաների, կան ողբացող ծնողներ, այս հոգեվիճակում դժվար է կատակել։ Հումորի ժամանակը չէ։ Լրջանալու ժամանակն է», - նշում է նա։
Մենահամերգի ժամանակ կհնչեն 15 երգ քաղաքական, սոցիալական, սիրային թեմաներով երգեր։ Կլինեն նաև կատակերգերի, որոնք, ինչպես խոստովանում է Հայկը, ծրագիրը թեթևացնելու համար է ներառել։ Այս համերգը նաև տարբերվելու է իր դրամատուրգիայով` ամեն մի երգ ունի իմաստ ու կոնկրետ նպատակ։
Հանրահայտ «Գինի լից» երգը նոր տեսահոլովակ ունի
«Այս երգերը ուրիշ են, քանի որ գրվել են պատերազմից հետո։ Թեմաները ուրիշ են, ցավը ուրիշ է, սերը ուրիշ է», - նշեց դերասանը։
Նա նաև պատմեց, թե ում է առաջինը ներկայացնում ստեղծագործությունները, ինչն է իրենց ցնծել պատերազմի ժամանակ ու ասաց` պատրաստվում է զբաղվել քաղաքականությամբ, թե ոչ։ Ավելի մանրամասն` տեսանյութում։