ԵՐԵՎԱՆ, 18 ապրիլի — Sputnik. Որոշ մթերքների հաճախակի օգտագործումը բացասաբար է ազդում տղամարդկանց առողջության վրա։ Sputnik ռադիոկայանին տված հարցազրույցում նախազգուշացրել է բժիշկ-սեքսոլոգ, հոգեթերապևտ, Սեքսոլոգ բժիշկների պրոֆեսիոնալ միավորման նախագահ Եվգենի Կուլգավչուկը: Նա ասել է՝ ուտելիքներից ինչը չարժե չարաշահել։
Տղամարդիկ առաջին հերթին պետք է խուսափեն այն մթերքներից ու ըմպելիքներից, որոնք նվազեցնում են տեստոստերոնի մակարդակը, քանի որ հենց այդ հորմոնն է «պատասխանատու» սեռական ցանկության համար: Բժշկի խոսքով՝ օրգանիզմի վրա նման ազդեցություն ունեն մեծ քանակությամբ սուրճը, ալկոհոլը, անանուխը։
«Սուրճի ավելցուկը, իսկ դա համարվում է օրական ավելի քան երեք բաժակը, կարող է վնասել մակերիկամների կեղևին, իսկ այն ուղղակիորեն մասնակցում է տեստոստերոնի արտադրությանը։ Մեծ քանակությամբ ալկոհոլի կանոնավոր օգտագործումը նույնպես նվազեցնում է տեստոստերոնի սինթեզը։ Անանուխը հանգստացնում է ոչ միայն նյարդային համակարգը, այլև սեռական բաղադրիչը», – ասել է Կուլգավչուկը:
Սեքսոլոգը նշել է, որ տղամարդկանց առողջության համար հատկապես կործանարար է գարեջուրը, քանի որ այն պարունակում է կանացի հորմոնների նմանօրինակ՝ ֆիտոէստրոգեն: Նույն հատկությունն ունեն նաև սոյա պարունակող մթերքները։
Նա ավելացրել է, որ օրգանիզմում տեստոստերոնի մակարդակի վրա բացասաբար է ազդում ճարպային հյուսվածքի չափազանց մեծ ծավալը: Այդ պատճառով տղամարդիկ պետք է իրենց սննդակարգից բացառեն այն ուտեստներն ու ըմպելիքները, որոնք հանգեցնում են ճարպակալման։
Հայտնի է դարձել սրտի կաթվածի ռիսկը նվազեցնող անսպասելի մթերքը
Կուլգավչուկը խորհուրդ է տալիս զերծ մնալ չափազանց կշտացնող ընթրիքներից։ Նրա խոսքով ՝ դրանք «անշարժացնում են» ու փաստացի «կռտում» են տղամարդուն։ Նա նշել է, որ այդ գործոնը վերացնելու լավագույն միջոցը լիարժեք ճաշն է։
«Գլխավոր սխալներից մեկը, դա հատկապես վերաբերում է մեգապոլիսի բնակիչներին, այն է, որ տղամարդիկ օրվա ընթացքում լիարժեք ճաշին ժամանակ չեն հատկացնում, երեկոյան տուն են վերադառնում ու մեծ քանակությամբ սնունդ են ընդունում։ Այդ դեպքում սնունդն իր բնույթով «կռտող» գործոն է դառնում, քանի որ ինքնապահպանման բնազդը միշտ կհաղթի վերարտադրության բնազդին: Կուշտ ընթրիքը, ըստ էության, նպաստում է տղամարդու անշարժացմանը, նա ալարում է սեռական խաղեր սկսել ու հակված է քնելու»,- ասել է նա։
Տեստոստերոնի մակարդակը բարձրացնելու համար նա տղամարդկանց խորհուրդ է տվել ավելի շատ կենդանական սպիտակուցներ, կանաչեղեն, ընկույզ ու լորի ձու ուտել։
«Ես տղամարդկանց խորհուրդ կտայի նախ հավասարակշռված սնունդ ընդունել, որը թույլ է տալիս ավելորդ քաշ չհավաքել։ Երկրորդ՝ բավարար քանակությամբ սպիտակուցներ, այդ թվում, կենդանական սպիտակուց օգտագործել։ Կարևոր է շատ օգտագործել կանաչիներ՝ մաղադանոս, նեխուր, սամիթ: Պարբերաբար օգտագործել փոքր քանակությամբ ընկույզ։ Օգտագործել լորի ձու, այդ թվում՝ հում վիճակում», – խորհուրդ է տվել Կուլգավչուկը։
Նրա խոսքով՝ տեստոստերոնը կարևոր է ոչ միայն սեռական ցանկության ձեւավորման համար։
«Դա հզորության, էներգիայի, մրցունակության, կենսունակության հորմոն է։ Այն յուրահատուկ ներքին էներգակիր է», - եզրափակել է բժիշկը։