ԵՐԵՎԱՆ, 2 ապրիլի – Sputnik. Երևանի ընդհանուր իրավասության դատարանում այսօր շարունակվում է «Մարտի 1»-ի գործով դատավարությունը:
Նիստի մեկնարկին Ռոբերտ Քոչարյանի փաստաբան Հայկ Ալումյանը նկատեց, որ դատավոր Աննա Դանիբեկյանը, խախտելով Քրեական դատավարության օրենսգրքի պահանջը, դատական նիստը սկսեց` առանց ներկայացնելու, թե որ դատական գործն է քննվում:
«Մենք չգիտենք, թե ինչ քրեական գործ է այս պահին քննվում: Արդյո՞ք դեռ դատարանը քննում է դատական գործն ըստ մեղադրանքի՝ Ռոբերտ Սեդրակի Քոչարյանի՝ Քրեական օրենսգրքի 300.1 հոդվածով և 311 հոդվածի 4-րդ մասի 2-րդ կետով»,- ասաց փաստաբանը, խնդրելով դատարանին հայտարարել, որպեսզի իրենց համար հստակ լինի, թե որ դատական գործին են իրենք ներկա:
«Ձեր հայտարարությունը դատարանը գտնում է առարկայազուրկ ու դրան չի անդրադառնում»,- հայտարարեց Աննա Դանիբեկյանը:
Ալումյանի հայտարարությանը միացավ նաև պաշտպանության նախկին նախարար Սեյրան Օհանյանի փաստաբան Կարեն Մեժլումյանը՝ խնդրելով պարզաբանել՝ արդյո՞ք քննվում է Սեյրան Օհանյանի գործը՝ 300.1 հոդվածով, թե ոչ:
Բայց դատարանը մնաց անդրդվելի՝ պնդելով, որ նման անհրաժեշտություն չի տեսնում։ Փոխարենը որոշեց կարգապահական սանկցիա կիրառել մեղադրող դատախազների, ինչպես նաև Քոչարյանի փաստաբաններ Հայկ Ալումյանի, Հովհաննես Խուդոյանի ու Արամ Վարդևանյանի նկատմամբ՝ դատական նախորդ նիստերին առանց թույլտվության բացակայելու ու դատարանի դահլիճը ինքնակամ լքելու համար։
Հիշեցնենք`2021թ.–ի մարտի 26–ին ՍԴ–ն որոշեց, որ Քոչարյանի դեմ հարուցված քրգործով 300.1 հոդվածը չի համապատասխանում ՀՀ Սահմանադրությանը։
ՀՀ երկրորդ նախագահն անցնում էր 2008 թվականի մարտի 1-ի դեպքերի վերաբերյալ քրեական գործով:
Նրա դեմ քրեական հետապնդումը սկսվել է 2018-ին Հայաստանում տեղի ունեցած իշխանափոխությունից հետո։ Այդ ժամանակ էլ Ռոբերտ Քոչարյանը հայտարարել էր քաղաքականություն վերադառնալու մասին։ ՀՀ երկրորդ նախագահին երեք անգամ կալանավորել են։
Կալանավայրում նա ընդհանուր առմամբ 500 օր է անցկացրել։ 2020 թվականի հունիսին Վերաքննիչ դատարանը նրան գրավի դիմաց ազատ արձակելու որոշում է կայացրել։
Քոչարյանը բազմիցս հայտարարել է, որ իր դեմ հարուցված քրեական գործն ամբողջությամբ շինծու է և ոչ այլ ինչ է, քան քաղաքական հետապնդում։
300.1 հոդվածի արտահայտություններն ու Վենետիկի հանձնաժողովի սպասելի կարծիքը
Քոչարյանի գործով ՍԴ-ն 2019-ի հուլիսի 18–ին որոշել էր խորհրդատվական կարծիք ստանալու համար դիմել ՄԻԵԴ և Վենետիկի հանձնաժողով` Երևանի ընդհանուր իրավասության դատարանի և Քոչարյանի դիմումների հիման վրա ՀՀ քրեական օրենսգրքի 300.1-րդ հոդվածի` սահմանադրական կարգը տապալելու, Սահմանադրությանը համապատասխանելու հարցը որոշելու վերաբերյալ։
Վենետիկի հանձնաժողովը հայտնել էր իր կարծիքը` արձանագրելով, որ սահմանադրական կարգի դեմ ուղղված հանցագործությունների ձևակերպման հարցում միջազգային պրակտիկայում միասնական մոտեցումներ չկան. պետությունների մի մասում հղումները վերաբերում են Սահմանադրությանն ամբողջությամբ, մյուսներն ուղղակի հղում են կատարում սահմանադրական կարգը պահպանելու անհրաժեշտությանը՝ առանց սահմանելու այն։
Հավելենք, որ ՀՀ ՔՕ 300.1 հոդվածը 2008-ի մարտի 1-ին չկար։ Այն որպես լրացում ավելացվել է 2009-ի մարտին։
Վարդևանյան. ՄԻԵԴ ներկայացվելիք հիմնավորումներն առնչվելու են 300.1 հոդվածի խոցելի կողմերին