ԵՐԵՎԱՆ, 1 ապրիլի – Sputnik. Թուրքիայի և Եվրասիական տնտեսական միության միջև առևտուրը զգալի արդյունք չի ունենա ԵԱՏՄ երկրների համար։ Այս հայտարարությունն այսօր արեց Եվրասիական տնտեսական հանձնաժողովի ինտեգրման և մակրոտնտեսության հարցերի նախարար, տնտեսական գիտությունների դոկտոր Սերգեյ Գլազևը Մոսկվա–Մինսկ–Երևան–Նուր-Սուլթան–Բիշքեկ տեսակապի ժամանակ։
«Թուրքիան ԵԱՏՄ երկրների մրցակիցն է տարբեր ապրանքների գծով, հատկապես` պարենի առանձնին խմբերի, որոնք արտահանում են մեր հարավային երկրները (Հայաստանն ու Ղրղզստանը – խմբ.)։ Բայց մենք չենք կարծում, որ Թուրքիայի ակտիվության հնարավոր ավելացումը կարող է ցնցումային էֆեկտ ունենալ», - ասաց Գլազևը։
Պատճառները երկուսն են. նախ ՝ Ռուսաստանի հետ Թուրքիայի ապրանքաշրջանառությունը գտնվում է հնարավորի սահմաններում, և երկրորդ՝ Անկարան մաքսային ընդհանուր գոտում է գտնվում Եվրամիության հետ, ինչը նշանակում է, որ չի կարող ստանալ որևէ այլ ինտեգրացիոն միավորման մաքսային արտոնություններ։
«Մեզ մոտ` ԵԱՏՄ–ում որևէ արտոնյալ ռեժիմ չի նախատեսվում Թուրքիայի համար, մենք այդ երկրի հետ աշխատում ենք առավել բարենպաստության ռեժիմով, և տեսանելի ապագայում այն չի փոխվի», - հավելեց Գլազևը։
Մարտի սկզբին ԵԱՏՄ-ն կրճատեց մաքսային արտոնությունների համակարգը զարգացող երկրների համար՝ այդ ցուցակից հանելով այնպիսի խոշոր երկրներ, ինչպիսիք են Թուրքիան և Չինաստանը:
Հիշեցնենք, որ Թուրքիան Ռուսաստանի՝ մեծությամբ վեցերորդ առևտրային գործընկերն է։ 2019 թվականին երկու երկրների ապրանքաշրջանառությունը գերազանցել է 25 մլրդ դոլարը։
Ռուսաստանից հիմնականում արտահանում են նավթ և նավթամթերք (մոտ 8,6 մլրդ դոլար), հատուկ նշանակության ապրանքներ (այսպես կոչված «փակ բաժին»)՝ շուրջ 5,2 մլրդ, ինչպես նաև սև մետաղագործության արտադրանք (մոտ 2,4 մլրդ դոլար) և հացահատիկային արտադրանք (մոտ 1,5 մլրդ դոլար):
Թուրքիայի ներմուծման կառուցվածքում մոտ 800 մլն դոլար են կազմում միրգն ու ընկուզեղենը (այս հարցում Թուրքիան որոշդ դեպքերում Հայաստանի ու Ղրղզստանի ուղղակի մրցակիցն է)։ Մոտ 800 մլն դոլար են կազմում սարքավորումներն ու էլեկտրոնիկան, մոտ 700 մլն՝ տեքստիլը, մոտ 500 մլն ՝ ավտոմեքենաները։
ԵԱՏՄ երկրները մտադիր են զարգացնել համագործակցությունը ավիաշինության ոլորտում. Քամալյան