ԵՐԵՎԱՆ, 31 մարտի - Sputnik. ՀՀ բարձր տեխնոլոգիաների արդյունաբերության նախարար Հակոբ Արշակյանը շարունակում է իր բնականոն աշխատանքը։ Տեղեկությունը Sputnik Արմենիային հայտնեց նախարարի մամուլի քարտուղար Լուսինե Մովսիսյանը։
Նշենք, որ այսօր մամուլում կրկին լուրեր են շրջանառվում, որ Արշակյանը հրաժարական է տվել, որը ստորագրել է ՀՀ վարչապետ Նիկոլ Փաշինյանը։
«Հակոբ Արշակյանը շարունակում է կատարել իր աշխատանքային պարտականությունները ու այս պահին հանդիպման է»,–ասաց Մովսիսյանը։
Հիշեցնենք` Հակոբ Արշակյանի մասնակցությամբ վերջերս երկու խոշոր սկանդալ եղավ։ Առաջինը Աբու Դաբիում անցկացվող IDEX 2021 միջազգային ռազմարդյունաբերական միջազգային ցուցահանդեսին հայկական ընկերությունների միասնական տաղավարում ռազմական տեխնիկայի ցուցանմուշները սահմանված ժամկետում չհասցնելու և ցուցահանդեսին դրանց ցուցադրումը չապահովելու դեպքը, մյուսը`լրագրող Փայլակ Ֆահրադյանի հետ կապված միջադեպը, որի ժամանակ Արշակյանը հարվածել էր լրագրողին և կոտրել նրա համակարգիչը։