ՀՀ Ազգային անվտանգության ծառայությունը բացահայտել է, որ Ա. Հ.-ն, զբաղեցնելով «Արմավիր» քրեակատարողական հիմնարկի անվտանգության ապահովման բաժնի առաջատար մասնագետի պաշտոնը, ՔԿՀ դատապարտյալից կաշառք է ստացել։
Մասնավորապես, Ա. Հ.-ն, իրավասու լինելով հսկողություն իրականացնել անձանց հանձնուքների, ծանրոցների, անձնական իրերի խուզարկությունների և զննումների նկատմամբ, մարտին ընդունել է դատապարտյալ Ա. Ն.-ի առաջարկը՝ արգելված առարկաներ ՔԿՀ բերել և հանձնել նրան։ Այդ ծառայության դիմաց Ա. Ն.-ի որդին պետք է որոշակի գումար փոխանցեր Ա. Հ.-ին։
Ա. Հ.-ն 2021 թվականի մարտի 18-ին՝ ժամը 20:30-ի սահմաններում, իր՝ Երևանում գտնվող տանը Ա. Ն.-ի որդուց ստացել է կաշառքի գումարը, ինչպես նաև դատապարտյալին փոխանցելու համար արգելված առարկաները։ Սակայն նա բռնվել է Ազգային անվտանգության ծառայության աշխատակիցների կողմից և ձերբակալվել:
Կատուն թմրանյութեր ու հեռախոսաքարտեր է տարել «Սևան» ՔԿՀ
Կատարված անձնական խուզարկությամբ Ա. Հ.-ի մոտից հայտնաբերվել են արգելված առարկաները։ Իսկ որպես կաշառք տրված գումարը հայտնաբերվել է նրա տանը կատարված խուզարկության արդյունքում: