ԵՐԵՎԱՆ, 19 մարտի – Sputnik․ Վերջին շրջանում հաճախակիացել են գործող իշխանության ներկայացուցիչների կողմից լրագրողներին թիրախավորելու դեպքերը։ Հայաստանի ժուռնալիստների միությունը հայտարարություն է տարածել՝ մատնանշելով վերջին շրջանում լայն արձագանք ստացած մի քանի դեպքերի։
Մասնավորապես, ԱԺ պաշտպանության և անվտանգության հանձնաժողովի նախագահ Անդրանիկ Քոչարյանն անցած շաբաթների ընթացքում մի քանի անգամ վիրավորել է իրենց մասնագիտական պարտականությունները կատարող լրագրողներին։ Հայտարարության մեջ ընդգծվում է, որ Քոչարյանը միշտ է աչքի ընկնում «ոչ յուրային մամուլի նկատմամբ իր հակաէթիկական վերաբերմունքով»։
Ի դեպ, «Արմնյուզ» հեռուստաընկերության լրագրող Անի Գևորգյանն արդեն դիմել է ԱԺ նախագահ Արարատ Միրզոյանին՝ Անդրանիկ Քոչարյանի դրսևորած վարքագիծը քննարկման առարկա դարձնելու համար:
ՀԺՄ-ն հիշեցնում է՝ վերջերս էլ վարչապետի մամուլի խոսնակ Մանե Գևորգյանը հրաժարվել է պատասխանել «Հրապարակ» օրաթերթի լրագրող Կորյուն Սիմոնյանի հարցերին՝ «խախտելով մասնագիտական ու պաշտոնեական վարքականոնի բոլոր նորմերը»։
Մամուլի դեմ կատարված վերջին՝ ամենաաղմկահարույց դեպքը դարձավ ԲՏԱ նախարար Հակոբ Արշակյանի հարձակումը լրագրող Փայլակ Ֆահրադյանի դեմ։
«Տեղի ունեցածից հետո նախարարը ներողություն է խնդրել բոլորից, բացի իր թիրախում հայտնված լրագրողից, ինչը էլ ավելի է ընդգծում իշխանության ներկայացուցչի արարքի ցինիզմը, այն դեպքում, երբ ցանկացած իրավական երկրում տվյալ պաշտոնյան ոչ միայն արդեն իսկ հրաժարական ներկայացրած կլիներ, այլ նրա արարքին կտրվեր քրեաիրավական գնահատական»,- նշված է հայտարարության մեջ։
Հայաստանի ժուռնալիստների միությունը խստորեն դատապարտում է ԶԼՄ-ների դեմ կատարվող բռնի գործողությունները և արձանագրում է, որ դրանք ստացել են համակարգային բնույթ՝ «տպավորություն թողնելով, որ իշխանությունը նպատակաուղղված արշավ է սկսել մամուլի դեմ»։
Միությունն իշխանություններից պահանջում է պատշաճ քննության ենթարկել վերը նշված և լրագրողների դեմ ուղղված բազմաթիվ այլ միջադեպերը, ապա ոչ միայն քաղաքական ու բարոյական, այլև իրավական գնահատականներ տալ կատարվածին։
Կոչ են անում ոչ միայն իշխանություններին, այլև իրավապահ մարմիններին, իրավապաշտպաններին խստորեն հետևել խոսքի ազատության և լրագրողների մասնագիտական գործունեության պատշաճ պայմանների ապահովմանն ու բացառելով մամուլի դեմ օրենքից չբխող որևէ գործողություն։
«Խոսքի ազատությունը բացարձակ արժեք է, ժողովրդավարական պետության ու հասարակության առանցքային հիմնասյուներից մեկը, և մամուլի դեմ ուղղված ցանկացած գործողություն հարված է հասցնում ժողովրդավարական կարևորագույն այդ ինստիտուտին»,- շեշտվում է հայտարարության մեջ։
Որևէ պատճառ չի կարող արդարացնել բռնությունը, առավել ևս՝ պաշտոնյայի կողմից. ՄԻՊ
ՀԺՄ-ն հիշեցնում է՝ առաջիկայում խորհրդարանական ընտրություններն են, իսկ ընտրական գործընթացներում մամուլի ազատությունը բազմապատիկ է կարևորվում։
Հիշեցնենք՝ երեկ լրագրող Փայլակ Ֆահրադյանը Facebook-ի իր էջի ուղիղ եթերում հայտարարել էր, որ բարձր տեխնոլոգիաների արդյունաբերության նախարար Հակոբ Արշակյանը բառացիորեն հարձակվել է իր վրա:
Նշենք, որ համացանցում լայնորեն տարածվեց նաև միջադեպի տեսանյութը, որում երևում է, թե ինչպես է նախարարը քաշքշում լրագրողին, նրա կին գործընկերոջը, ապա հարվածում լրագրողի դեմքին և կոտրում համակարգիչը։ Ավելի ուշ Արշակյանը Facebook-ի իր էջում ներողություն է խնդրել միջադեպին ներկա բոլոր քաղաքացիներից։ Գրառման վերջում նշել է, որ պատրաստ է պատասխանատվություն կրել արածի համար։
Այսօր մամուլում և սոցցանցերում տեղեկություններ էին տարածվել, որ Հակոբ Արշակյանը պաշտոնանկ կարվի լրագրող Փայլակ Ֆահրադյանի հետ միջադեպից հետո։ Սակայն նրա խոսնակը նշեց, որ նման տեղեկություններ իրենք չունեն և նախարարը բնականոն աշխատում է։
Կատարվածի առթիվ դատապարտող հայտարարությամբ է հանդես եկել նաև ՄԻՊ-ը՝ նշելով, որ Որևէ պատճառ չի կարող արդարացնել մասնագիտական աշխատանք կատարող լրագրողի նկատմամբ բռնությունը, առավել ևս՝ պաշտոնյայի կողմից։