ԵՐԵՎԱՆ, 18 մարտի – Sputnik. ՀՀ երրորդ նախագահ Սերժ Սարգսյանի և մյուսների դեմ հարուցված քրգործով անցնող երկու անձ մահացել է։ Երևանի ընդհանուր իրավասության դատարանում մեկնարկած հերթական նիստի ժամանակ դատավոր Վահե Միսակյանը հայտնեց` դատարանը գործով անցնող երկու անձանց հանդեպ քրեական հետապնդումը դադարեցնելու միջնորդություններ է ստացել։
Մասնավորապես, 2021-ի հունվարի 10-ին մահացել է ՀՀ նախկին գյուղատնտեսության նախարարի տեղակալ Սամվել Գալստյանը, իսկ փետրվարի 18-ին մահացել է ՀՀ նախկին գյուղատնտեսության նախարար Սերգո Կարապետյանը։
«Փաստաբանների միջոցով միջնորդություններ են ներկայացվել Սամվել Գալստյանի որդուց` Նարեկ Գալստյանից, և Սերգո Կարապետյանի այրիից` Նվարդ Կարապետյանից։ Նրանք պահանջել են Նարեկ Գալստյանի և Սերգո Կարապետյանի նկատմամբ քրեական հետապնդումը դադարեցնել նրանց մահվան հիմքով»,–ասաց դատավորը։
Միջնորդությունների վերաբերյալ առարկություններ չհնչեցին։ Դատարանը հեռացավ խորհրդակցական սենյակ` որոշում կայացնելու։ Դատավոր Վահե Միսակյանն ասաց` որոշումը կհրապարակի այսօր` ժամը 15։00-ին, որից հետո նիստը կշարունակվի։
Նշենք, որ ինչպես Սամվել Գալստյանը, այնպես էլ Սերգո Կարապետյանը մահացել էին կորոնավիրուսի հետևանքով առաջացած բարդություններից։
Ի աջակցություն Սերժ Սարգսյանի` քաղաքացիները հավաքվել են դատարանի բակում. նա կխոսի