Սփյուռքի գործերի գլխավոր հանձնակատար Զարեհ Սինանյանը դժվարանում է առանձնացնել, թե որ գերատեսչության կամ անձի դերակատարումն է մեծ եղել ադրբեջանական գերության մեջ գտնվող լիբանանահայ Մարալ Նաջարյանին վերադարձնելու գործում։ Ասում է` ՌԴ այցի շրջանակում անձամբ է Մարալին վերադարձնելու հարցը ՌԴ փոխարտգործնախարար Անդրեյ Ռուդենկոյի հետ քննարկել։
Նշենք, որ ՀՀ վարչապետ Նիկոլ Փաշինյանի որոշմամբ` 2021 թվականի փետրվարի 24-ից մինչև մարտի 7-ը սփյուռքի գործերի գլխավոր հանձնակատար Զարեհ Սինանյանը գործուղվել էր Ռուսաստան:
«Ես այնտեղ պնդել եմ, որ Մարալը բառիս բուն իմաստով պատանդ է և, քանի որ գերեվարվել է որպես չկռվող անձ, այսինքն` մարտական գործողություններին չմասնակցած անձ և զինադադարի հաստատումից հետո, նրան որպես այդպիսին պահելն անիմաստ է և անբարոյական»,- Sputnik Արմենիայի հետ զրույցում ասաց նա։
Գլխավոր հանձնակատարը Մոսկվայում քննարկել է նաև Ադրբեջանում պահվող մյուս հայ ռազմագերիներին և քաղաքացիական անձանց օր առաջ ադրբեջանական գերությունից ազատելու հարցը։ Նրա խոսքով` Մարալի հետ գերեվարված Վիգեն Էլջեքյանի մասին դեռևս տեղեկություններ չկան։
«Ընդհանուր կոնտեքստում իհարկե քննարկվել է նաև Վիգենի հարցը։ Մեր ռուս գործընկերները հավաստիացրել են, որ այս հարցն իրենց համար էլ մնում է շատ կարևոր»,- նշեց Սինանյանը։
Թե ընդհանուր առմամբ քանի սփյուռքահայ է պահվում Ադրբեջանում, Սինանյանը տեղեկություն չունի, սակայն բաց աղբյուրներին հղում անելով նշում է, որ թշնամի երկրում առնվազն 3 հայրենակից ունենք Միջին Արևելքից` Լիբանանից կամ Սիրիայից, որոնք գերության մեջ են գտնվում։
Հիշեցնենք, որ լիբանանահայ կինը գերեվարվել էր Հայաստանի, Ռուսաստանի և Ադրբեջանի ղեկավարների միջև եռակողմ հայտարարության ստորագրումից անմիջապես հետո՝ նոյեմբերի 10-ին, Բերձորում, որտեղ մեկնել էր անձնական իրերը վերցնելու։
Մարալից բացի, Ադրբեջանում ենթադրաբար ևս 3 հայ կին գերի կա. Զոհրաբյան
Մարալ Նաջարյանը երեկ` մարտի 10–ին գերությունից վերադարձվել է Բեյրութ։
Նաջարյանի հետ գերեվարվել էր Բերձոր մեկնած մեկ այլ լիբանանահայ՝ տաքսու վարորդ Վիգեն Էուլջեքյանը, որին Ադրբեջանը ներկայացնում է որպես 2500 դոլարի դիմաց կռվող վարձկան։ Նրան մեղադրանք է առաջադրվել 5 հոդվածով։