Սուրեն Պարսյանի դիտարկմամբ` օրինակ` սեղմված գազի շուկայում ի հայտ եկան մի քանի գործոններ, որոնք ազդեցին գազալցակայաններում վաճառվող գազի գնի վրա։ Նա նշեց, որ դեռ 2020 թվականի հուլիսի 19-ին գազի գինը թանկացավ 10 հազար և ավելի խմ սպառում ունեցող բաժանորդների համար, իսկ կոնկրետ գազալցակայանների գազի գինը բարձրացավ մոտ վեց տոկոսով, ինչն, օրինակ, տրանսպորտային ծառայությունների դեպքում լուրջ խնդիր է, քանի որ մեր տրանսպորտի մոտ 90 տոկոսն աշխատում է գազով։
«Գազի գնագոյացման վրա ազդող մյուս գործոնը դոլարի փոխարժեքն է դրամի համեմատությամբ։ Արցախյան պատերազմից հետո մեր արտարժույթի շուկայում գրանցվեց կտրուկ անկում, դրամը շատ արագ տեմպերով արժեզրկվեց, դոլարային հոսքերը դեպի մեր երկիր կրճատվեցին, ինչը կանխատեսելի էր նաև այն առումով, որ 2020 թվականը ֆինանսատնտեսական առումով ճգնաժամային տարի էր, որին գումարվեց պատերազմը»,– նշեց տնտեսագետը։
Պարսյանի տեղեկացմամբ` գազալցակայանների պարագայում գազի սակագինը որոշված է դոլարով` 1000 խմ–ի դիմաց 255 դոլար, նրանք ամսվա վերջում գազի դիմաց վճարում են ոչ թե դրամով, այլ դոլարին համարժեք դրամով, իսկ դոլարի փոխարժեքը վերցվում է նախորդ ամսվա 25-ի դրությամբ առկա կուրսի հաշվառմամբ։
Տնտեսագետի կանխատեսմամբ` քանի որ դրամը շարունակվում է արժեզրկվել, դա ուղղակիորեն ապագայում նույնպես ազդելու է սեղմված գազի գնի վրա, և նրանք, ովքեր օգտվում են գազալցակայաններից, պետք է սպասեն, որ հետագայում ևս հնարավոր է գազի գնի բարձրացում։
Պարսյանի գնահատմամբ` գազամատակարարման համակարգում կան բավականին լուրջ տնտեսական, համակարգային բացթողումներ, որոնք նույնպես ազդում են գազի սակագնի ձևավորման վրա, ինչը բնականաբար հետագայում իր ազդեցությունն է թողնում ընդհանուր տնտեսության վրա, որովհետև գազն ու էլեկտրաէներգիան ուղղակիորեն ազդում են Հայաստանում արտադրվող ապրանքների կամ մատուցվող ծառայությունների ինքնարժեքի վրա։
Ռուսաստանը աստիճանաբար հաղթահարում է դոլարային կախվածությունը. Պետդումայի նախագահ