ԵՐԵՎԱՆ, 4 մարտի - Sputnik. Ճանապարհային երթևեկության կանոնների խախտման դեպքերին վերաբերող դատական նիստերն առաջիկայում կանցնեն գրավոր ընթացակարգով։
ՀՀ վարչական դատավարության օրենսգրքում համապատասխան փոփոխության մասին այսօր կառավարության նիստում զեկուցեց ՀՀ արդարադատության նախարար Ռուստամ Բադասյանը։
«Մեր կարծիքով այնտեղ, որտեղ վեճը հնարավորինս պարզ է, բանավոր քննության կարիք չկա, և կարող ենք սահմանափակվել գրավոր ընթացակարգով»,– ասաց Բադասյանը` հավելով, որ վերջին տարիներին ՃԿ խախտումների վիճարկման դեպքերը 5-6 անգամ ավելացել են։
Իսկ գրավոր ընթացակարգով քննելու առաջարկվող գործերը կազմում են ընդհանուրի շուրջ 80 տոկոսը։
Բադասյանը նշեց, որ այս գործերով վերաքննիչ բողոքները ևս նախատեսվում է իրականացնել գրավոր ընթացակարգով։
Նշենք, որ վարչական դատավարության գործող օրենսգիրքը գրավոր ընթացակարգ որևէ դեպքում չի նախատեսում։
Հիշեցնենք` մինչ այդ ՀՀ կառավարության առաջարկով վարորդներին վերաբերող փոփոխություն է նախատեսվում նաև «Պետական տուրքի մասին» ՀՀ օրենքում, որի համաձայն, վարորդների համար դատարան դիմելը կթանկանա։ Նոր օրենքով նախատեսվում է, որ ՃԵԿ խախտումները դատական կարգով բողոքարկելու համար նրանք ստիպված կլինեն առնվազն 4 հազար դրամ պետտուրք վճարել։
Գյումրիում դանակահարել են շտապօգնության վարորդի. վիճակը ծանր է