ԵՐԵՎԱՆ, 4 մարտի - Sputnik. ՀՀ կառավարությունն այսօրվա նիստում հավանություն տվեց Հավաքական անվտանգության մասին պայմանագրի կազմակերպության (ՀԱՊԿ) գործունեության մասին երկու համաձայնագրերի։ Դրանցից մեկը վերաբերում է ՀԱՊԿ հավաքական զինուժի նյութատեխնիկական և բժշկական համատեղ ապահովմանը։
Երկրորդ համաձայնագրով փոփոխություններ են կատարվում 2007 թ.–ի հոկտեմբերի 6-ին կնքված ՀԱՊԿ խաղաղապահ գործունեության համաձայնագրում։
Համաձայնագրում առաջարկվում է սահմանել, որ ՀԱՊԿ խաղաղապահ ուժերը կարող են ներառվել ՄԱԿ խաղաղապահ առաքելություններում։ Դրա համար ՄԱԿ–ի լիազոր ստորաբաժանման հետ պետք է կնքվի համաձայնագիր։
Բացի այդ ՀԱՊԿ յուրաքանչյուր անդամ պետություն առանձին իրավունք կունենա իր զորախմբերն ուղարկել ՄԱԿ մանդատի ներքո խաղաղապահ գործողությունների մասնակցելու՝ այդ մասին նախապես տեղեկացնելով Հավաքական անվտանգության խորհրդին:
Համաձայնագրում առաջարկվում է ներառել նաև «համակարգող պետություն» հասկացությունը։ Այդ պետությունը պատասխանատու է լինելու ՄԱԿ խաղաղապահ գործողություններում ՀԱՊԿ–ի ուժերի նյութատեխնիկական և կազմակերպչական հարցերի լուծման համար:
Կառավարությունն առանց զեկուցման ու քննարկման հավանության արժանացրեց ՀԱՊԿ համաձայնագրերում առաջարկվող փոփոխությունները։ Առաջիկայում դրանք կուղարկվեն ԱԺ` վերջնական վավերացման համար։
Հայաստանը չի դիմել ՀԱՊԿ-ին, ու մեխանիզմը չի գործարկվել. Զասը՝ Երևանին օգնելու մասին