Վահե Դավթյանի դիտարկմամբ`եթե հարցը դիտարկենք կարճաժամկետ կտրվածքով, ապա նշված գործարքն ակնհայտորեն որևէ լուրջ փոխակերպումների չի բերելու Հայաստանի բենզինի, առհասարակ նավթամթերքների շուկայում։ Ըստ նրա` Հայաստանում առկա են 4-5 ընկերություններ, որոնք զբաղվում են նավթամթերքների ներկրմամբ, ռուսական «Ռոսնեֆտ» ընկերությունից ձեռք են բերում նավթամթերք` ներկրելով Հայաստան և այնուհետև վերավաճառելով տեղական ընկերություններին, սակայն «ՌԱՆ ՕՅԼ»–ն ինքնին նավթամթերք, մասնավորապես բենզին ու դիզվառելիք ներկրող չէ, ըստ այդմ` նրա ազդեցությունը շուկայի կառուցվածքի և դրանում առկա կոնյուկտուրայի վրա բավականին ցածր է։
«Բայց հաշվի առնելով «ՍԻԼ» ընկերության հավակնությունները և այն հանգամանքը, որ Խաչատուր Սուքիասյանը գործող վարչակազմի ամենավառ արտահայտված ֆավորիտներից է, նա փորձում է ավելի երկարաժամկետ խաղ խաղալ»,– Sputnik Արմենիայի հետ զրույցում ասաց Էներգետիկ անվտանգության ինստիտուտի տնօրենը։
Դավթյանի կարծիքով` մոնոպոլ դիրք զբաղեցնելու համար «ՍԻԼ»–ը նախևառաջ պետք է կայանա որպես նավթամթերք ներկրող կազմակերպություն, ուստի տվյալ գործարքը երկարաժամկետ տիրույթում պետք է դիտարկել հենց այդ տրամաբանությամբ, հետևաբար կազմակերպությունը նույնպես կփորձի Սադախլոյում ձեռք բերել ռուսական նավթամթերք և ներհայաստանյան շուկայում թելադրել կանոններ ու կոնյուկտուրա։
«Այս պահի դրությամբ այն դասավորվածությունը, որն առկա է մեր շուկայում, դեռևս թույլ չի տալիս «ՍԻԼ»–ին իր 10 տոկոս մասնաբաժնով լուրջ ազդեցություն ունենալ շուկայական գործընթացների վրա։ Չմոռանանք, որ բոլոր այն կազմակերպությունները, որոնք արդեն իսկ հանդես են գալիս որպես առանցքային խաղացողներ, տարիներ շարունակ գործում են կարտելային համաձայնության սկզբունքներով` իրականացնելով համաձայնեցված գնային քաղաքականություն, հետևաբար նոր խաղացողը նույնպես պետք է ստանձնի ներկրողի գործառույթներ և փորձի լուրջ դերակատարում ունենալ շուկայում»,– նշեց Էներգետիկ անվտանգության ինստիտուտի տնօրենը։
Դավթյանն առկա գործընթացները դիտարկեց նաև մակրոտնտեսական տեսանկյունից` դրանք տեղավորելով ԵԱՏՄ շրջանակներում տեղի ունեցող ինտեգրացիոն գործընթացների մեջ։ Նրա խոսքով` մինչև 2025 թվականը պետք է կայանա ԵԱՏՄ–ի նավթի ու նավթամթերքի ընդհանուր շուկան, որի մաս է կազմելու Հայաստանը, հետևաբար այդ շուկայի ձևավորման առանցքային իմպերատիվներից է ազգային շուկաների ազատականացումը և մրցունակության աստիճանի բարձրացումը։
Դավթյանի համոզմամբ`հետագայում միավորումների գործընթացն այս ազատականացման քաղաքականության շրջանակներում անխուսափելի է, և դա այն սցենարն է, որով առաջ է գնալու ներհայաստանյան շուկան, բայցևայնպես պետք է հասկանալ, թե խոշորացումն ինչ տարբերակով է տեղի ունենում, արդյոք իրագործվո՞ւմ է ազատ շուկայական հարաբերությունների սկզբունքների հիման վրա, թե՞ այնուամենայնիվ ունենալու է որոշակի քաղաքական աֆիլացում կամ նպատակադրում։
Հիշեցնենք` այսօր հայտնի դարձավ, որ Խաչատուր Սուքիասյանին պատկանող «ՍԻԼ կոնցեռն» ընկերությունը ձեռք է բերել «ՌԱՆ ՕՅԼ»-ը, կոնցեռնի մամուլի խոսնակ Աննա Մկրտչյանը Sputnik Արմենիայի հետ զրույցում վստահեցրել էր, որ մենաշնորհ չի լինի։