ԵՐԵՎԱՆ, 6 փետրվարի – Sputnik. Ալեքսանդր Սպենդիարյանի անվան օպերայի և բալետի ազգային ակադեմիական թատրոնի դահլիճում մեկնարկել է «Ուժեղ Հայաստան Ռուսաստանի հետ. հանուն նոր միության» շարժման հիմնադիր համագումարը։
Համագումարում ելույթ ունեցավ ՍԻՄ կուսակցության նախագահ Հայկ Բաբուխանյանը։
«Ժողովուրդ, ամեն ինչ կորած չէ, պետք չէ հույսը կորցնել։ Մենք ի վիճակի ենք գտնել մեր ճանապարհը, անցնել դրանով ու հաղթել։ Այսօր շատ մայրեր մտածում են` բա ի՞նչ է լինելու իրենց երեխաների հետ։ Մենք այստեղ չենք հավաքվել մեզ համար, այլ մեր երեխաների ու թոռների համար։ Մեր սերունդը պարտավոր է ստեղծել ապահով, ուժեղ, ազնիվ Հայաստան։ Այդ պատճառով այսօր մենք ստեղծում ենք մեր երազանքների Հայաստանի հիմնադիր շարժումը, որը ապաքաղաքական է, որովհետև մենք պաշտոններ չենք բաժանում։ Պետք է հստակ հասկանանք, որ հայ ժողովրդի թշնամին քնած չէ և այն, ինչ կատարվեց, էլի է կատարվելու, եթե դա մենք չգիտակցենք և չկանխենք։ Մեր ճանապարհը Ռուսաստանի հետ է»,–ասաց նա։
Ընդդիմության տեղապտույտը, կամ ինչ է թաքնված Շուշիի մասին Փաշինյանի խոսքերի տակ
Իր հերթին «Այլանս» կուսակցության նախագահ, ԱԺ պատգամավոր Տիգրան Ուրիխանյանը նշեց, որ Ռուսաստանի հետ պետք է խորացնել տնտեսական համագործակցությունը։ Պետք է պայմանավորվել, որ ռուսական արդյունաբերության կարիքների համար աշխատեն հայկական գործարանները։
Համագումարից հետո մասնակիցները քայլերթով կգնան դեպի կառավարության շենքի մոտ։
Նշենք, որ նոյեմբերի 9–ին եռակողմ հայտարարության ընդունումից հետո Հայաստանում պարբերաբար հանրահավաքներ են տեղի ունենում` ՀՀ վարչապետ Նիկոլ Փաշինյանի հրաժարականի պահանջով։ Հանրապետության հրապարակում դեկտեմբերի 22-ից ընդդիմադիրներն անժամկետ նստացույց են հայտարարել նույն պահանջով՝ վարչապետի հրաժարական:
Բեկումնային հանդիպում. Սերժ Սարգսյանը հակված է ընտրությունները բոյկոտելուն. «Ժողովուրդ»