ԵՐԵՎԱՆ, 4 փետրվարի – Sputnik. Երևանի «Հոլիվուդ» կոչվող թաղամասում ապօրինի խաղատուն է գործել։ Ոստիկանության մամուլի ծառայությունը հայտնում է, որ ապօրինի խաղատունը գործել է նշված թաղամասում վարձակալության հանձնված առանձնատներից մեկում։ Վարձակալները խաղատանը կազմակերպել են «պոկեր» տեսակի շահումով խաղեր՝ առանց պետական գրանցման ու հատուկ թույլտվության՝ լիցենզիայի։ Նրանց խաղի մասնակիցներին վաճառել են 1000, 5000 ու 25000 դրամին համարժեք խաղաքարեր։
«Վարձու խաղարկողների միջոցով մասնակիցների յուրաքանչյուր շահումից կատարվել են 5 տոկոսի չափով գանձումներ՝ հօգուտ կազմակերպիչների։ Ապօրինությունների հետևանքով առնվազն պետական տուրքի չափով պետությանը պատճառվել է 5 միլիարդ 500 միլիոն դրամի վնաս»,- նշված է հաղորդագրության մեջ։
Դեպքի վայրի զննությամբ հայտնաբերվել են խաղատնային բազմատեսակ պարագաներ։
Քրեական ոստիկանության գլխավոր վարչություն բերման ենթարկված խաղերի կազմակերպիչ և մասնակից անձանց խուզարկության ժամանակ հայտնաբերվել են խաղասրահում շրջանառելու համար նախատեսված խոշոր չափի գումարներ, ինչպես նաև մարիխուանայի նմանվող զանգված, կաթուցիչ, դանակ և այլն։
ՊԵԿ փոխնախագահի` խաղատուն այցելելու հանգամանքները պարզվում են
Հարուցվել է քրեական գործ, որն ուղարկվել է ՊԵԿ քննչական վարչություն։