ԵՐԵՎԱՆ, 3 փետրվարի – Sputnik. ԱԺ փոխնախագահ, «Իմ քայլը» խմբակցության անդամ Ալեն Սիմոնյանն այսօր ԱԺ ամբիոնից հայտարարեց, որ, չնայած սահմանված արգելքին, հայաստանյան շատ գործարարներ այսօր էլ շարունակում են Թուրքիայից ապրանք ներկրել։
«Բերում են։ Ընդմիջմանը ես ձեզ ցույց կտամ մի բան, որն ուղղակի չեմ ուզում ամբիոնից ասել»,– ասաց նա` պատասխանելով մինչ այդ ընդդիմադիր պատգամավորների հնչեցրած քննադատական հայտարարություններին. նրանք իշխանությանը մեղադրում էին Թուրքիայի հետ հարաբերություններ հաստատելու մեջ։
«Բարգավաճ Հայաստան» խմբակցության անդամ Շաքե Իսայանը հայտարարեց, որ այսօր, երբ Հայաստանի գլխին առկախված է անվտանգային խնդիրը, Դատական օրենսգրքի քննարկման ժամանակը չէ։ Նա նաև հիշեցրեց, որ երբ 2 տարի շարունակ խորհրդարանական ընդդիմությունը պնդում էր դատական համակարգի բարեփոխումների անհրաժեշտության մասին, իշխանությունը կենտրոնացած էր բացառապես ՍԴ–ի խնդրի վրա։
Արգելքը չի վերաբերում թուրքական բեռնատարներին. ՊԵԿ–ը` Երևանում շրջող մեքենաների մասին
«Դուք շարունակում եք խաբել ՀՀ քաղաքացիներին, ինչպես խաբեցիք 2018-ին և չասացիք, որ, օրինակ, դուք գալիս եք թուրքի հետ էժան առևտուր անելու համար։ Իսկ այսօր արդեն հպարտ ժողովրդի զավակներին զոհելուց հետո առանց քաշվելու հայտարարում եք, որ կարևոր չէ, թե Արցախն ում պատմական հողն է»,– ասաց պատգամավորը։
«Բարգավաճ Հայաստան» խմբակցության անդամ Արթուր Դալլաքյանն էլ իշխանություններին մեղադրեց Թուրքիայի հետ տնտեսական ու բարիդրացիական հարաբերություններ հաստատելու մասին հայտարարություններով հանդես գալու մեջ։
«Տպավորություն է, թե մոռացել ենք` ով է մեր թշնամին։ Չմոռանանք, թե քանի միլիոն հայ է կոտորվել դրանց ձեռքով»,– ասաց նա։
Նույն խմբակցության անդամ Արման Աբովյանն էլ իր ելույթում հիշեցրեց հայտնի արտահայտությունը` «ոչինչ չի մոռացվել, ոչ ոք չի մոռացվել»։
Իր ելույթում Ալեն Սիմոնյանը համաձայնեց. «Այո՛, պարոն Աբովյա՛ն, ոչինչ չի մոռացվել», ապա հիշեցրեց, որ «Բարգավաճ Հայաստան» իշխանական կոալիցիայի անդամ էր այն ժամանակ, երբ ստորագրվել էին հայ–թուրքական արձանագրությունները։
Հիշեցնենք` 2020թ–ին ընդունված որոշմամբ` Հայաստանում թուրքական ապրանքների 6-ամսյա արգելքն ուժի մեջ է մտել 2021թ–ի հունվարի 1-ից։