Ճանապարհների ապաշրջափակումը ոչ միայն նպաստավոր չէ Հայաստանի համար, այլև բավականին մեծ ռիսկեր է պարունակում։ Sputnik Արմենիայի հետ զրույցում նման կարծիք հայտնեց թուրքագետ, թարգմանիչ Տիրան Լոքմագյոզյանը։
Բոլոր նրանց, ովքեր հասցրել են ուրախանալ դեպի Ռուսաստան և Իրան այլընտրանքային ճանապարհ ունենալու համար, Լոքմագյոզյանը շտապում է հիշեցնել` մինչ այդ էլ ունեինք հարևան երկրներին կապող ցամաքային ճանապարհներ։
Ձմեռային ամիսներին, ինչ խոսք, Վրաստանում որոշակի խնդիրներ ծագում են, բայց դա չի նշանակում, թե Թուրքիայի կամ Ադրբեջանի տարածքով անցնող ճանապարհները հարթ են լինելու։ Բացի այդ, ըստ նրա կարելի էր 20-30 տարվա ընթացքում Վրաստանի տարածքով անցնող թունել կառուցել,և հարցն ամբողջովին կլուծվեր։
«Հիմա խոսակցություններ են գնում Լարսում թունել կառուցելու մասին։ 5, 10 կամ 20-30 տարի առաջ էլ կարելի էր ինչ-որ բան անել, և մենք այսօրվա նման խնդրի առաջ չէինք կանգնի»,- ասաց նա։
Թուրքագետը հիշում է` տարիներ առաջ, երբ շատերը կրկին ոգևորված էին Թուրքիայի հետ ճանապարհը բացվելու լուրից և երևակայական ծրագրեր էին մշակում, այն ժամանակ էլ ինքը մտահոգություն էր հայտնում և սեփական հաշվարկները ներկայացնում։
«Ի՞նչ երաշխիք ունենք, որ Թուրքիան Հայաստանի համար գները չի բարձրացնելու, ճանապարհները չի փակելու, դժվարություններ չի ստեղծելու, մինչդեռ մենք երաշխիքներ տալիս ենք, մենք մեր տարածքն ենք տրամադրելու, այն էլ հսկողությունը մեզ չի պատկանելու. շատ խնդիրներ կան»,- նշեց թուրքագետը։
Դիտարկմանը, թե տնտեսական հեռանկարների վերաբերյալ իշխանությունների ակնկալիքները հաշվարկված չեն, թուրքագետն արձագանքեց` գուցե նաև հաշվարկվա՞ծ են` ի վնաս Հայաստանի։
«Ադրբեջանը նման երաշխիքներ չի տալիս, խոսում է Մեղրիի, Ադրբեջանի բեռների կարանտինի մասին, որը, եթե Մեղրիով անցնի լինելու է իրենց սուվերեն տարածքը և լինելու է ռուսական հսկողության տա՞կ, իսկ մե՞նք...»,- տարակուսանք հայտնեց Լոքմագյոզյանը։
Նրա կարծիքով` գործող իշխանությունը չի կարող կամ չի ուզում այս խնդիրների լուծման ուղղությամբ քայլեր ձեռնարկել։ Ավելին, նրա գնահատմամբ, ընդգծված դիտավորություն և անգործություն է դրանք բարձիթողի վիճակում թողնելը։
Ի՞նչ մտավախություններ ունի Ռոբերտ Քոչարյանը ճանապարհների ապաշրջափակման հեռանկարից
Այդպես եղավ նաև գերիների հարցում, երբ «բոլորը բոլորի դիմաց» պայմանավորվածության դիմաց մենք հանձնեցինք անգամ հանցագործներին, իսկ մեր տղաները շարունակում են մնալ ադրբեջանական բանտերում և կտտանքների ենթարկվում։