ԵՐԵՎԱՆ, 12 հունվարի – Sputnik. Կորոնավիրուսից մահվան դեպքերը, ինչպես համավարկի սկզբում էր, 70 տարեկաններից բարձրերի շրջանում է գրանցվում։ Այսօր կայացած մամուլի ասուլիսի ժամանակ, պատասխանելով Sputnik Արմենիայի հարցին, ասաց ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը։
«Երիտասարդների շրջանում կորոնավիրուսից մահվան դեպքերի միտում չկա։ Վիրուսից մահվան դեպքերը հիմնականում բարձր տարիքի անձանց շրջանում է գրանցվում, ինչպես նաև խրոնիկական հիվանդություններ ունեցողների շրջանում»,–ասաց Սահակյանը։
Անդրադառնալով ՀՀ-ում բավարար կոլեկտիվ իմունային համակարգ ունենալ-չունենալուն` Սահակյանը նշեց, որ բնակչության 70-80 տոկոսը պետք է վարակված լինի, որ նոր միայն համարվի իմուն շերտի ձևավորում։ Այս պահին, սակայն, Հայաստանում չկա այդ ցուցանիշը։
Սահակյանը հավելեց, որ ըստ հետազոտությունների՝ կորոնավիրուսով վարակվելու դեպքում անձի մոտ 6 ամսվա իմունիտետ է առաջանում։
Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցն էլ իր հերթին նշեց, որ կորոնավիրուսի բրիտանական շտամը (միկրոօրգանիզմների համախումբ-խմբ.) ավելի արագ է վարակում մարդկանց և դրա` Հայաստան հասնելու դեպքում, հնարավոր է կորոնավիրուսային վարակի երրորդ ալիք սկսվի։ Նա ասաց նաև, որ դեռ չկան տվյալներ, թե նոր շտամով վարակվելու դեպքում մահվան հավանականությունն ավելի մեծ է, ավելին, հիվանդացությունը նույն կերպ է ընթանում։
Ճառագայթումն ընդդեմ կորոնավիրուսի․ գիտնականները բուժման նոր մեթոդ են մշակում
«Նոր շտամի դեմ պայքարի միջոցները նույն են, ինչ այժմ կիրառում ենք` դիմակ կրել, ախտահանվել, պահպանել սոցիալական հեռավորություն։ Ինչ վերաբերում է դրա հետազոտությանը, ապա այժմ ուսումնասիրում ենք այդ գործընթացը, որպեսզի անհրաժեշտության դեպքում մենք էլ դրա հետազոտմամբ զբաղվել։ Բրիտանական շտամը որոշելու հետազոտությունն ավելի բարդ է»,–ասաց Բակունցը։
Հիշեցնենք, որ կառավարության որոշմամբ` Հայաստանում կարանտինի ժամկետը երկարաձգվել է 6 ամսով` մինչև հուլիսի 11-ը։
Հայաստանում «սովորական» կորոնավիրուսով վարակվածների թիվը վերջին մեկ օրում ավելացել է 355–ով և դարձել 162643։