Ղարաբաղյան վերջին պատերազմը 44 օր տևեց, սակայն Քարվաճառը պաշտպանող զինվորական ստորաբաժանման համար հոկտեմբերի 2-ն էր վճռորոշ։ Sputnik Արմենիայի հետ զրույցում զորամասի հրամանատար, գնդապետ Վիգեն Մկրտչյանը նշեց, որ այդ օրը մարտական գործողությունները մոտ 10 ժամ տևեցին։
«Այդ օրը հակառակորդը հարձակում նախաձեռնեց մի շարք կարևոր մարտական դիրքերի ուղղությամբ։ Միաժամանակ մենք հակահարձակում իրականացրինք։ Ստորաբաժանումը բարձր մակարդակով կատարեց իր առջև դրված խնդիրը։ Ժամը 15:15 արձանագրինք, որ կարողացանք բոլոր ուղղություններով կանխել հակառակորդի առաջխաղացումը՝ նրան կենդանի ուժի ու տեխնիկայի մեծ կորուստներ պատճառելով։ Թույլ չտվեցինք, որ նրանք մոտենան ռազմավարական կարևորություն ունեցող դիրքերին», - պարզաբանեց Մկրտչյանը։
Զորամասի հրամանատար, փոխգնդապետ Սամվել Բալոյանը նշեց, որ իրենք հաշված րոպեներ ունեին որոշում կայացնելու համար։ Շատ բան կախված էր հրամանատարի գործողություններից ու ստորաբաժանման մարտունակությունից։
Կրտսեր Սերժանտ Վարդան Հովսեփյանն իր հերթին նշեց, որ ընդմիշտ կհիշի պատերազմի սկսելու օրը։ Սեպտեմբերի 27-ին տագնապի նշան հնչեց, նրանք բարձրացան ու զբաղեցրին մարտական դիրքերը։ Ամբողջ 44 օրվա ընթացքում նա չի մտածել մահվան կան անհաջողության մասին։ Հաղթական է տրամադրված եղել։
Նա նշեց, որ պատերազմը փոխեց իրեն, ավելի լուրջ դարձրեց։
«Մեզանից յուրաքանչյուրի համար մեր մարտական ընկերների կորուստը ցավ է։ Առանձնահատուկ ոչինչ չկա, պատերազմի ամբողջ ընթացքն էր ինձ ու իմ կյանքի համար առանձնահատուկ»,- ասաց Հովսեփյանը։
Քարվաճառ մտնելուց հետո պահանջել են դուրս գալ Սոթքի հանքի տարածքից. ԳՇ պետի առաջին տեղակալ
Հրետանային մարտկոցի հաշվարկի հրամանատար, սերժանտ Տիգրան Արաբյանը նույնպես մարտական գործողությունների առաջին իսկ օրվանից վճռական էր տրամադրված։ Նա նշեց, որ չէր նկատում դժվարությունները, առաջին հինգ օրն էր դժվապ, երբ նրանք պարզապես աչք կպցնելու ժամանակ չունեին։ Տիգրանը վստահ է, որ իրենց շատ է օգնել հավատն ու սերը հայրենիքի հանդեպ։
Հրետանային մարտկոցի հաշվարկի հրամանատար, կրտսեր սերժանտ Գոռ Դավթյանը նշեց, որ անհավանական ուժ էր տալիս միայն այն միտքը, որ թշնամուց պաշտպանում են ծնողներին ու հայրենիքը։