ԵՐԵՎԱՆ, 30 դեկտեմբերի - Sputnik. Գեղարքունիքի մարզում սահմանների որոշման հարցը մարդկանց խնդրի առաջ է կանգնեցրել, կենսական իրավունքները լրջորեն վտանգելուց մինչև ապրուստը հոգալու հարցեր առաջ բերել։ Հայաստանի մարդու իրավունքների պաշտպան Արման Թաթոյանի գլխավորած աշխատանքային խումբը երեկ այցելել է մարզ։
Պաշտպանի գրասենյակը տեղեկացնում է, որ այցի ընթացքում անցկացվել են հանդիպում համապատասխան զորամիավորման հրամանատարի հետ, քննարկումներ՝ մարզպետի, նաև Գեղամասար համայնքի ղեկավարի հետ։ Պաշտպանն այցելել և աշխատանքային քննարկումներ է ունեցել Սոթք, Կութ, Նորաբակ և այլ գյուղերում:
«Սահմանային դարձած գյուղերի բնակիչներն իրական մտահոգություններն են հայտնել, որոնք վերաբերում են ինչպես կյանքի և անվտանգության, ֆիզիկական և հոգեկան անձեռնմխելիության, սեփականության, այնպես էլ կենսական կարևորության մյուս իրավունքներին, այդ թվում՝ գյուղատնտեսությամբ ու անասնապահության զբաղվելու անհնարինությանը»,- նշված է հաղորդագրության մեջ։
Թաթոյանը նաև հանդիպել է Սոթքի ոսկու հանքավայրը շահագործող «Գեոպրոմայնինգ գոլդ» ընկերության ղեկավարության հետ։ Քննարկվել են ինչպես գործարարության ոլորտին, այնպես էլ աշխատողների իրավունքների երաշխավորմանն առնչվող հարցեր։
Պաշտպանի գրասենյակը հայտնում է, որ այս այցի արդյունքները կամփոփվեն և գրություններ կուղարկվեն պետական կառավարման մարմիններին: Ինչպես նաև կկատարվեն անհրաժեշտ հարցումներ ու կպահանջվեն համապատասխան պարզաբանումներ:
Սահմանազատման ավարտից հետո 2 պետությունների միջև համաձայնագիր է կնքվում. ԱԳՆ-ն՝ ՄԻՊ-ին