ԵՐԵՎԱՆ, 25 դեկտեմբերի - Sputnik. Ավելի քան 70 օր անհետ կորած համարվող 6 ժամկետային զինծառայողներից 5–ն այս պահին գտնվում են Երևանի Այրվածքաբանության ազգային կենտրոնում։ Տեղեկությունը Sputnik Արմենիային հայտնեց Այրվածքաբանության ազգային կենտրոնի այրվածքաբան Կարինե Բաբայանը։
Նշենք, որ մինչ այս տղաները գտնվում էին Ստեփանակերտի հիվանդանոցում։
«Զինծառայողներից 5–ը երեկ են մեզ մոտ տեղափոխվել։ Նրանց մոտ առկա է վերջույթների ցրտահարություն։ Բուժում են ստանում»,–ասաց Բաբայանը։
Հիշեցնենք`դեկտեմբերի 20–ին հայտնի դարձավ, որ Ադրբեջանի վերահսկողության տակ անցած տարածքներում իրականացվող որոնողական աշխատանքների արդյունքում 6 ժամկետային զինծառայողներ են գտնվել։ Նրանց դիմավորել էին Արցախի նախագահ Արայիկ Հարությունյանն ու հարազատները։
Ավելի ուշ տղաները պատմել էին, որ ողջ ընթացքում միայն բրինձ էին կերել և երջանիկ պատահականությամբ ողջ մնացել։
«Ոչ մի պատասխան չստացա». անհետ կորած զինվորի հարազատը` Փաշինյանի հետ հանդիպման մասին