ԵՐԵՎԱՆ, 22 դեկտեմբերի – Sputnik. Երևանի ավագանին այսօր փոխքաղաքապետ ընտրեց «Իմ քայլը» խմբակցության անդամ Գայանե Մելքոմ Մելքոմյանին։
Նրա թեկնածությանը կողմ քվեարկեցին ավագանու անդամներից 34–ը, 1–ը դեմ էր, 1–ը` ձեռնպահ։
«Իրականում պաշտոնը համակարգող և վերահսկող դեր ունի, դա է այդ պաշտոնի առաքելությունն ու դերը, որին ենթակա արդեն կան համապատասխան համակարգի ստորաբաժանումներ և կազմակերպություններ, որոնք ունեն անհրաժեշտ մասնագիտական կարողություններն ու փորձառությունը: Հարկավոր է նրանց հետ աշխատելով վերհանել ոլորտի խնդիրները, ճիշտ թիրախներ սահմանել, դրանց լուծման ճանապարհային քարտեզ ունենալ և վերահսկել այդ նպատակների իրագործման այս ճանապարհը»,- քվեարկությունից առաջ ասաց Մելքոմյանը:
Նրա խոսքով` մասնագիտությամբ իրավաբան լինելը չի խանգարի, հակառակը՝ շատ ավելի լավ կլինի, որ քաղաքապետն ունենա իրավաբան տեղակալ, որովհետև իրավաբանն ունի այնպիսի հմտություններ, որոնք բոլոր ոլորտներում կարևոր են և անհրաժեշտ։
Հիշեցնենք` Երևանի փոխքաղաքապետ Տիգրան Վիրաբյանը դեկտեմբերի սկզբին հրաժարականի դիմում էր ներկայացրել՝ տեղեկացնելով, որ Հանրային հեռուստաընկերությունից գլխավոր պրոդյուսերի պաշտոնը ստանձնելու առաջարկ է ստացել:
Գայանե Մելքոմ Մելքոնյանը Ծնվել է 1987թ. սեպտեմբերի 29-ին Միացյալ Թագավորության Մանչեսթեր քաղաքում, 1991թ.-ից ապրում է Երևանում:
1993-2003թթ. սովորել է Երևանի Խրիմյան Հայրիկի անվան թիվ 10 միջնակարգ դպրոցում:
2003-2007թթ. սովորել և գերազանցությամբ ավարտել է Հայաստանում ֆրանսիական համալսարանի իրավագիտության ֆակուլտետը:
2007-2009թթ. սովորել է Հայաստանում ֆրանսիական համալսարանի իրավագիտության ֆակուլտետում՝ ստանալով միջազգային գործարարական իրավունքի մագիստրոսի աստիճան:
2009-2010թթ. սովորել է Մաքգիլի համալսարանում՝ ստանալով իրավունքի մագիստրոսի աստիճան։
2007-2009թթ. աշխատել է «Թրեյդերս հաուս» ՍՊԸ-ում` զբաղեցնելով իրավաբանի, այնուհետև` գլխավոր իրավաբանի և գրասենյակի կառավարչի պաշտոնը:
2010-2015թթ. աշխատել է «Օրանժ Արմենիա» ՓԲԸ-ում (2015թ.-ի օգոստոսից՝ «Յուքոմ» ՍՊԸ)՝ զբաղեցնելով իրավաբանի, այնուհետև՝ ավագ իրավաբանի պաշտոնը:
2015-2017թթ. աշխատել է «Էլեկտրոնային կառավարման ենթակառուցվածքների ներդրման գրասենյակ» ՓԲԸ-ում՝ զբաղեցնելով գլխավոր իրավախորհրդատուի պաշտոնը:
2017թ.-ից մինչ օրս աշխատում է «Էլեկտրոնային առողջապահության ազգային օպերատոր» ՓԲԸ-ում՝ զբաղեցնելով գլխավոր իրավախորհրդատուի պաշտոնը։
2013թ.-ից մինչ օրս «Քաղաքական դիսկուրս» հանդեսի հիմնադիր համախմբագիր է, քաղաքագիտական, քաղաքատնտեսական հոդվածների թարգմանիչ։
2010թ. Երևանի հանրային կանաչապատ տարածքների պաշտպանությամբ զբաղվող «Մենք ենք այս քաղաքի տերը» քաղաքացիական նախաձեռնության հիմնադիր անդամ է:
2018թ. սեպտեմբերի 23-ին կայացած Երևանի ավագանու արտահերթ ընտրությունների արդյունքում «Իմ քայլը» կուսակցությունների դաշինքի համամասնական ցուցակով ընտրվել է Երևան քաղաքի ավագանու անդամ:
Անկուսակցական է: Ամուսնացած է։