ԵՐԵՎԱՆ, 19 դեկտեմբերի - Sputnik. Ադրբեջանի տիրապետության տակ անցած Ֆիզուլու, Հադրութի և Ջաբրայիլի շրջաններում երեկ իրականացված որոնողական աշխատանքների ընթացքում հայտնաբերվել է 27 զինծառայողի աճյուն և 2 քաղաքացիական անձանց մարմիններ:
ԱՀ ԱԻՊԾ լրատվական ծառայության պետ Հունան Թադևոսյանը Sputnik Արմենիայի հետ զրույցում պարզաբանեց, որ սպանված քաղաքացիները տղամարդիկ են, Հադրութի շրջանի Տող գյուղից:
Նա նաև հայտնեց, որ որոնողական աշխատանքներն այսօր կշարունակվեն Հադրութի, Ջաբրայիլի, Իշխանաձորի ու Որոտանի տարածքներում։
Որոնողական աշխատանքներին իրենց ցանկությամբ մասնակցում են նաև անհետ կորածների հարազատներն ու արցախյան պատերազմի մասնակից, տեղանքին քաջածանոթ կամավորները։
Հիշեցնենք` որոնողական աշխատանքները մեկնարկել են նոյեմբերի 13-ին Շուշիից և շարունակվում են բոլոր այն բնակավայրերում ու տարածքներում, որտեղ տեղի են ունեցել մարտական գործողություններ։ Դրանց արդյունքում առ այսօր հայտնաբերվել են 969 անհետ կորածների մարմիններ:
Ողջ հայտնաբերվել են 2 զինծառայող` Շուշիի տարածքում, որոնցից մեկը` ադրբեջանցի։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ Դեկտեմբերի 11-ին ՀՀ առողջապահության նախարարությունը հայտնեց, որ դատաբժշկական փորձաքննության է ենթարկվել արցախյան պատերազմի հետևանքով զոհված 2996 զինծառայողի մարմին։
Դատագենետիկական հետազոտության արդյունքում այդ օրվա դրությամբ նույնականացվել են նրանցից միայն 302–ի մարմինները։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը