ԵՐԵՎԱՆ, 18 դեկտեմբերի - Sputnik. Կլիմայի փոփոխությունն ու որպես հետևանք շրջակա միջավայրի փոփոխությունը կհանգեցնեն այն բանին, որ մարդիկ կդառնան ավելի նյարդային ու կավելանան ընկճախտի դեպքերը։ Նման կարծիք է հայտնել հոգեբան, ՌԳԱ պրոֆեսոր Տիմոֆեյ Նեստիկը։
«Իհարկե ամենալավատեսական կանխատեսումների դեպքում (խոսքը կլիմայի մասին է, – խմբ․) մենք չենք կարող խուսափել կլիմայի փոփոխությունների հոգեբանական որոշ հետևանքներից։ Դրանք տարատեսակ դեպրեսիաներն են, որոնք կապված են շրջակա միջավայրի փոփոխությունների հետ։ Դրանք իհարկե մեր կոգնիտիվ ունակությունների ու աֆեկտիվ գործընթացների փոփոխություններ են, այդ թվում դյուրագրգիռ լինելը։ Դա լուրջ մարտահրավեր էր սոցիալական ինստիտուտների հանդեպ վստահության համար», - ասել է Նեստիկը «Կլիմայական անվտանգության հարցում COVID-19-ի դրական ու բացասական ազդեցությունները» խորագրով ռուս-բրիտանական սեմինարի ժամանակ։
Նա նշել է նաև, որ գլոբալ փոփոխությունների ժամանակ մարդկանց կարող է միավորել միասնականության զգացողությունը, որը հիմնված է ոչ թե սպառնալիքների ու պատերազմի հռետորաբանության, այլ սեփական համակեցությունը պահպանելու ձգտման վրա։