Այսօր երեկոյան Երևանի Գարեգին Նժդեհի անվան հրապարակից մեկնարկեց ընդդիմության նախաձեռնած ջահերով երթը դեպի Եռաբլուր։ Մի քանի հազար քաղաքացիներ, մոմերը ձեռքներում պահած, քայլեցին դեպի զինվորական պանթեոն՝ հայրենիքի պաշտպանության համար նահատակված հերոսների շիրիմների առջև խոնարհվելու։
Բազմահազարանոց երթի առջևից բարձր պահած տանում էին խաչը, որի աջ և ձախ կողմերում էլ Հայաստանի և Արցախի հանրապետությունների պետական դրոշներն էին։
Խաչի ու հայոց եռագույնի հետևից քայլում էին հոգևորականները, իսկ նրանց հետևից՝ երթի մյուս մասնակիցները։
Sputnik Արմենիայի լուսանկարիչների կադրերում երևում է՝ մասնակիցների թիվն այնքան մեծ էր, որ երբ հազարավոր մարդիկ արդեն Եռաբլուրում էին, դեպի պանթեոն տանող ճանապարհը դեռ բազմամարդ էր. լույսերի հոսքը երկար ժամանակ չէր դադարում։
Եռաբլուրում հոգևորականները հանուն հայրենիքի ընկած հերոսների հիշատակի խնկարկման ու ոգեկոչման արարողություն անցկացրին։