Ռուս խաղաղապահներն ամրապնդում են պաշտպանական դիտակետերը Լեռնային Ղարաբաղում։ Այս պահին այնտեղ մոտ 23 հսկիչ անցակետ է գործում։ Դրանցից յուրաքանչյուրը հագեցվում է գերժամանակակից տեխնիկայով՝ սադրանքները կանխելու համար։
Հրադադարի ռեժիմի այդպիսի մի խախտում խաղաղապահները կանխել են մի քանի օր առաջ։
«Դեկտեմբերի 11-ին Հադրութի շրջանի Խծաբերդ և Հին Թաղեր բնակավայրերի մերձակայքում հրադադարի ռեժիմի խախտում է տեղի ունեցել, որը կանխվել է ռուսական խաղաղապահ զորակազմի գործողությունների շնորհիվ։ Ներկայում շրջանում իրավիճակը կարգավորվել է»,-ասել է Արցախում ՌԴ խաղաղապահ զորակազմի հրամանատար Ռուստամ Մուրադովը։
Հիշեցնենք` մամուլում տեղեկություններ կային այն մասին, որ Արցախի Հադրութի շրջանի Խծաբերդ և Հին Թաղեր գյուղերի տարածքում մարտերը վերսկսվել են:
Այս գյուղերում դեկտեմբերի 11-ին և 12-ին, արդեն իսկ մարտական բախումներ էին տեղի ունեցել, որոնք դեկտեմբերի 13-ին հանգուցալուծվել էին ռուս խաղաղապահների միջամտությամբ ու տվյալ տարածքում վերահսկողություն սահմանելով։
Sputnik Արմենիայի տեղեկություններով` այս երկու գյուղերը ներկա պահին դարձյալ վերադարձվել են ադրբեջանական կողմին ու գտնվում են Ադրբեջանի ԶՈւ–ի վերահսկողության տակ։
Նշենք, որ համացանոցում արդեն իսկ տարածվել է նորացված քարտեզ, որտեղ Խծաբերդն ու Հին Թաղերը ներկայացված են որպես ադրբեջանական վերահսկողության տարածք։
Այս մասին է վկայում նաև ՌԴ ՊՆ հրապարակած նոր քարտեզը։
Հին Թաղերը կորցրել ենք, Խծաբերդում և՛ ադրբեջանցիներ կան, և՛ հայեր. Հադրութի շրջանի ղեկավար