Արտակ Զեյնալյանի դիտարկմամբ` թեև Ժնևի միջազգային կոնվենցիայի համաձայն ռազմական գործողությունների ավարտից հետո պետությունները, որոնք միացել են այդ կոնվենցիային, պարտավոր են վերադարձնել ռազմագերիներին և ձերբակալված քաղաքացիական անձանց, բայցևայնպես այդ կոնվենցիան պահպանելու մեխանիզմներ առանձնապես չկան։
«Մենք փորձում ենք հարցը տեղափոխել Եվրոպական կոնվենցիայի դաշտ, որպեսզի մտցնենք Եվրոպական դատարանի իրավազորության տիրույթ, փորձում ենք մարդկանց նույնականացնել, որպեսզի այդ ճանապարհով ապահովենք նրանց անվտանգությունն ու երաշխավորենք կյանքը»,– նշեց իրավապաշտպանը։
Զեյնալյանի տեղեկացմամբ` միշտ հույս կա, որ Կարմիր Խաչի միջազգային կազմակերպությունն ավելի ակտիվորեն կներգրավվի գերիներին վերադարձնելու գործընթացում։ Ըստ նրա`Ադրբեջանի կամայականության պատճառով հայ գերիների վերադարձը ձգձգվում է և հարուցում բարդություններ։
«Բաքվում անկարող են կառավարել տեղեկատվական ամբողջ տիրույթը, որովհետև դաշտային հրամանատարների ենթակայության տակ կան գերիներ, որոնց մասին չգիտեն»,– տեղեկացրեց իրավապաշտպանը։
Գերիների փոխանակման երկրորդ փուլի իրագործումն օրերի հարց է. իմքայլական պատգամավոր
Նա հորդորեց ձեռնպահ մնալ գերիների մասին համացանցում տվյալներ, լուսանկարներ և տեսանյութեր տարածելուց, թեև նշեց, որ հետաքրքրությունը թեմայի նկատմամբ բավականին մեծ է, այդուհանդերձ առկա են նաև իրավունքների պաշտպանության ընթացակարգային շահեր, մարտավարական, կամ, այսպես կոչված, գաղտնիքի իրավունք, ինչին մարդիկ պետք է վերաբերվեն հարգանքով։
Ըստ իրավապաշտպանի՝ մեր երկրում հասարակագիտական բազային գիտելիքներն առհասարակ շատ հեռու են նվազագույն մակարդակից։