Արմեն Բադալյանի դիտարկմամբ` որպեսզի ընդդիմությանը հաջողվի վերջնականապես կազմալուծել պետական առանց այդ էլ կազմալուծված ապարատը, ապա պետք է ավելի կրեատիվ դարձնի իր գործողությունները։ Ըստ նրա, դա կարող է տևել որոշ ժամանակ, բայց փաստ է, որ Հայաստանում արդեն իսկ առկա է անիշխանության վիճակ` չնայած վարչապետի պնդումներին, որ ամեն ինչ վերահսկողության տակ է։
«Պետական ապարատում նույնպես անորոշություն է, շատերը չգիտեն, թե ինչպես են զարգանալու իրադարձությունները։ Շատ դեպքերում ուժային կառույցներն ու դատական համակարգն արդեն ամբողջությամբ դուրս են գործադիր մարմնի վերահսկողությունից, վարչապետի հենարանը մնացել է միայն ոստիկանությունը։ Եթե ընդդիմությանը հաջողվի կազմալուծման գործընթացը հասցնել ավարտին, ավելի կրեատիվ վերաբերմունք ցուցաբերել PR տեխնոլոգիաների նկատմամբ, ավելի մարդաշատ դարձնել ակցիաները, որի ուղղությամբ ակտիվ աշխատում են, ապա կարող են հաջողության հասնել»,– նշեց քաղտեխնոլոգը։
Բադալյանը վկայակոչեց այն իրողությունը, որ շատ ղեկավարներ հաստատապես հայտարարել են, որ մնալու են մինչև վերջ, բայց շատ արագ պաշտոնաթող են եղել։ Ըստ նրա` «ժողովուրդ» ասվածը խիստ հարաբերական է, որովհետև վարչապետը կարող է ասել, որ հրաժարական կտա, եթե փողոց դուրս գա մեկ միլիոն մարդ կամ բոլոր ընտրողները, սակայն դա պոպուլիստական մոտեցում է, ամեն ինչ կախված կլինի ընդդիմության գործելակերպից։
Ինչի՞ համար է մեր կառավարությունը. Գյումրիում պահանջում են Փաշինյանի հրաժարականը
Անդրադառնալով այն հարցին, որ վարչապետը եռօրյա սուգ է հայտարարել դեկտեմբերի 19-ին, իսկ ընդդիմությունը նշում է, որ դա միտումնավոր է արված, քանզի հենց այդ օրը նախապես որոշված էր կազմակերպել մեծ հանրահավաք, Բադալյանը դժվարացավ ասել, թե այդտեղ միտում կա, թե ոչ, բայց փարատելով այդ օրը բախումների հետ կապված մտահոգությունները` նշեց, որ դրա համար պետք է փողոց դուրս գան վարչապետի կողմնակիցները, բայց նրանք մեծ թիվ չեն կազմում։