ԵՐԵՎԱՆ, 14 դեկտեմբերի – Sputnik. Կարմիր խաչի միջազգային կոմիտեն չի մասնակցում Հայաստանի և Ադրբեջանի միջև սկսված «բոլորը բոլորի դիմաց» սկզբունքով գերիների և պատանդների փոխանակման գործընթացին: Տեղեկությունը Sputnik Արմենիայի թղթակցի հետ զրույցում հայտնեց ԿԽՄԿ հայաստանյան ներկայացուցչության հաղորդակցման ծրագրերի ղեկավար Զառա Ամատունին՝ նշելով, որ Կարմիր խաչը չի զբաղվում այդ հարցով։
«Կոնկրետ օպերացիային չենք մասնակցում։ Ռազմագերիների փոխանակումը ԿԽՄԿ-ի աջակցությամբ և մասնակցությամբ է տեղի ունենում այն դեպքում, եթե կողմերը դիմում են ԿԽՄԿ-ին՝ խնդրելով օգնել կազմակերպել փոխանակումը»,-ասաց Ամատունին։
Նա նշեց, որ կողմերը կարող են փոխանցման մասին պայմանավորվել նաև այլ ճանապարհով։ Սակայն այս իրավիճակում կարևոր է գերիների իրավունքների պահպանումը։ Ամատունին պարզաբանեց, որ ԿԽՄԿ-ն այս ամբողջ ընթացքում կողմերի հետ երկխոսություն է վարել, սակայն փոխանցման ժամկետների, վայրի և միջոցի վերաբերյալ որոշումն ընդունում են հակամարտության կողմերը:
Նա նշեց, որ ԿԽՄԿ ներկայացուցիչները շարունակում են այցելել հակամարտության պատճառով կալանավորված մարդկանց։ Ինչ վերաբերում է հետագա գործողություններին, ապա ամեն ինչ կախված է իրավիճակից։
Արման Թաթոյանն այցելել է հայկական կողմին փոխանցված 3 գերիներին
Գերիների և պատանդների փոխանակման գործընթացի շրջանակներում արդեն իսկ Բաքու են վերադարձել Շահբազ Գուլիևն ու Դիլհամ Ասկերովը, որոնք Արցախում դատապարտվել էին դիվերսիա կատարելու, դեռահասի և հայ սպայի սպանության համար:
ՀՀ վարչապետ Նիկոլ Փաշինյանն ավելի վաղ հայտնել էր, որ Հայաստանն ու Ադրբեջանը կարողացել են համաձայնեցնել գերիների փոխանակումը «բոլորը բոլորի դիմաց» սկզբունքով: Արցախի մարդու իրավունքների պաշտպան Արտակ Բեգլարյանի տվյալներով՝ ադրբեջանական կողմում գտնվում են 60 հայ ռազմագերի և 40 քաղաքացիական անձ։
Պետական հանձնաժողովը նշել է, որ բանակցություններն ընթացել են, մասնավորապես, Կարմիր խաչի միջազգային կոմիտեի հետ։
Ինչպես հաղորդում Է Sputnik Ադրբեջանը, գործընթացի շրջանակում Շահբազ Գուլիևն ու Դիլհամ Ասկերովը, որոնք պատիժ էին կրում Ղարաբաղում, ինքնաթիռով վերադարձել են Ադրբեջան:
Հիշեցնենք, որ արցախյան դատարանն Ասկերովին ցմահ, իսկ Գուլիևին 22 տարվա ազատազրկման էր դատապարտել՝ մեղավոր ճանաչելով լրտեսության, պետական սահմանի ապօրինի հատման, ռազմամթերք կրելու, անձի առևանգման և սպանության համար։
Ադրբեջանից Հայաստան վերադարձած 3 գերիները տարեցներ են
Նրանք 2014 թվականի հուլիսի 4-ին առևանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ և Մանաշիդ համայնքների միջև ընկած անտառային զանգվածում: