Երկրաշարժի հետևանքով անօթևան մնացած ընտանիքների խնդիրների լուծմանն ուղղված պետական աջակցության ծրագրի բոլոր 5406 շահառուներն ապահովվել են բնակարանով։ Տեղեկությունը հայտնել է ՀՀ քաղաքաշինության կոմիտեի Բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը, որի հետ զրույցը հրապարակվել է ՀՀ կառավարության ֆեյսբուքյան էջում։
«Սակայն մշտապես քննարկվում է հարցը, թե արդյոք ծրագրի ավարտով անօթևանների խնդիրը լուծվում է վերջնականապես։ Սա ընդամենը մեկ մասնավոր ծրագիր է` մեկ առանձին խմբի ուղղված։ Բացի այդ, անօթևանների խնդիրը սրանով չի լուծվում»,–ասում է Արզումանյանը։
Նրա խոսքով` տնակներում դեռ ապրողներ կան, սակայն նրանց հիմնական մասը երկրորդային պատճառներով է դրանցում հայտնվել։ Օրինակ` մի մասը բնակարան է ստացել, սակայն սոցիալական վիճակից ելնելով` վաճառել են այն, կամ էլ հարևան մարզից են եկել ու տնակում ապրում։ Տնակների թիվը, ըստ Արզումանյանի, հատում է 7200-ի սահմանը։
Արզումանյանը հայտնեց նաև, որ տնակները քարտեզագրվել են, և կախված խնդիրներից և անօթևան դառնալու պատճառներից` աջակցություն կլինի։
Հիշեցնենք` Սպիտակի ավերիչ երկրաշարժից արդեն անցել է 32 տարի: Միայն պաշտոնական տվյալներով՝ երկրաշարժի հետևանքով զոհվել է 25 հազար մարդ, 140 հազարը հաշմանդամ են դարձել, ավելի քան 500 հազարը զրկվել են տնից։
Անթիվ վիրավորների տեղափոխում, անհաշվելի թռիչքներ. «Շիրակ» օդակայանը` երկրաշարժի օրերին