ԵՐԵՎԱՆ, 10 դեկտեմբերի - Sputnik. Սեպտեմբերի 27-ից Հայաստանի և Արցախի Հանրապետության նկատմամբ օտարերկրյա պետության կողմից իրականացված ռազմական գործողությունների արդյունքում տուժած կամավորների բուժումն ու վերականգնողական բուժօգնությունը կիրականացվի պետության կողմից` անվճար և արտոնյալ պայմաններով:
Որոշումն ընդունվել է այսօր ՀՀ կառավարության հերթական նիստում` առանց զեկուցման ու քննարկման։
Հատկանշական է, որ, ըստ որոշման նախագծում ներկայացված տվյալների, պատերազմում վիրավորված ու բուժման կարիք ունեցող անձանց թիվը շուրջ 4000 է։
Չնայած ժամկետային զինծառայողների ու փրկարարների բուժման համար ՀՀ պետական բյուջեով ամեն տարի որոշակի գումար հատկացվում է, բայց այս տարվա բյուջեում նախատեսված գումարը չի բավարարում։
«Նախատեսվում է «Զինծառայողներին, ինչպես նաև փրկարար ծառայողներին և նրանց ընտանիքի անդամներին բժշկական օգնության ծառայություններ» ծրագրի շրջանակներում դեպքերի թվի ավելացում շուրջ 4000-ով, որը կպահանջի լրացուցիչ շուրջ 2,870 մլրդ. ՀՀ դրամ»,– ասված է կառավարության հաստատած որոշման նախագծում։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ Հայաստանի առողջապահության նախարարության դատաբժշկական ծառայությունը փորձաքննել է 2718 զոհված զինծառայողի մարմին:
Դեկտեմբերի 2-ի տվյալներով՝ Արցախի ՊԲ-ն հրապարակել է 1746 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Անհետ կորածների, գերիների ու վիրավորների թվի մասին պաշտոնական տվյալներ չկան։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը