ԵՐԵՎԱՆ, 10 դեկտեմբերի – Sputnik. ՀՀ կառավարությունը կփոխհատուցի սեպտեմբերի 27-ին Ադրբեջանի կողմից Արցախի Հանրապետության դեմ սանձազերծված պատերազմին մասնակցած ուսանողների, մասնակիցների ուսանող երեխաների, ամուսինների, կանանց ուսման վարձերը։ Այս մասին որոշման նախագիծը ՀՀ կառավարության այսօրվա նիստում ներկայացրեց ՀՀ ԿԳՄՍ նորանշանակ նախարար Վահրամ Դումանյանը։
Նրա խոսքով` փոխահոտուցման որոշումը վերաբերում է միայն 2020-21թթ ուսումնական տարվա առաջին կիսամյակին։
«Միջոցառման նպատակն է ուսման վարձի փոխհատուցում տրամադրել Հայաստանի Հանրապետությունում գործող միջին մասնագիտական, բարձրագույն և հետբուհական (կրթական ծրագրեր իրականացնող ուսումնական հաստատությունների կամ կազմակերպությունների առկա և հեռակա ուսուցմամբ վճարովի համակարգում միջին մասնագիտական կրթական ծրագրի, բակալավրիատի, մագիստրատուրայի, ասպիրանտուրայի և կլինիկական օրդինատուրայի սովորողներին»,– ներկայացրեց Դումանյանը։
Ընթացիկ կիսամյակի ուսման վարձը կփոխհատուցվի 100 %–ով։
ՀՀ վարչապետ Նիկոլ Փաշինյանը հետաքրքրվեց` եթե ուսման վարձն արդեն վճարված է, ինչպե՞ս է փոխհատուցում տրամադրվելու այդ դեպքում։
«Այդ չափով նա կստանա և կփոխանցվի հաջորդ կիսամյակի համար»,– պարզաբանեց նախարարը։
Նշենք, որ այս նախագծի մասին Նիկոլ Փաշինյանը հայտնել էր նախապես` մեկ շաբաթ առաջ, կառավարության նախորդ նիստում, հույս հայտնելով, որ որոշումը կկայացվի անհետաձգելի կարգով։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ Հայաստանի առողջապահության նախարարության դատաբժշկական ծառայությունը փորձաքննել է 2718 զոհված զինծառայողի մարմին:
Դեկտեմբերի 2-ի տվյալներով՝ Արցախի ՊԲ-ն հրապարակել է 1746 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Անհետ կորածների, գերիների ու վիրավորների թվի մասին պաշտոնական տվյալներ չկան։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը