Ստեփան Դանիելյանի դիտարկմամբ` գործող իշխանությունների պահվածքը կարող է ունենալ երկու բնութագրիչ. առաջինն անձնական անվտանգության զգացողությունն է, քանի որ իշխանության ներկայացուցիչները վստահ չեն իրենց ապագայի հանդեպ, ուստի փորձում են ամեն կերպ պահպանել իշխանությունը։ Ըստ նրա` անվտանգության երաշխիք կարող է լինել ընդդիմության հայտարարությունը, որ խորհրդարանը կգործի մեկ տարի, և Վազգեն Մանուկյանի առաջարկը, որ եթե «Իմ քայլում» կան մասնագետներ, նրանք նույնպես կմնան կառավարությունում։
«Երկրորդ բնութագրիչը քաղաքական պահն է, որովհետև կա տպավորություն, թե Նիկոլ Փաշինյանն ու նրա շրջապատը դեռևս անելիքներ ունեն և առաջ են քաշում իրենց ծրագիրը` աջակցություն ստանալով նաև արտասահմանում գտնվող հովանավորներից, նրանք վստահ են, որ դրսում ունեն շատ լուրջ տանիք»,– նշեց քաղաքագետը։
Դանիելյանի գնահատմամբ` քանի որ Արցախի հարցում կան աշխարհաքաղաքական շահերի բախումներ, ուժային կենտրոնների հակասություններ, և խնդիրը վերաբերում է ամբողջ Հարավային Կովկասին, հետևաբար ՀՀ իշխանությունն այդ համատեքստում փորձում է ինչ–որ ծրագիր իրականացնել։ Ըստ քաղաքագետի` ընդդիմության առաջնորդ Վազգեն Մանուկյանն այնուամենայնիվ պետք է ներկայացնի որոշակի օրակարգ, որպեսզի հանրության համար պարզ լինի, թե նա մեկ տարվա ընթացքում ինչ քայլեր է անելու, կոնկրետ ինչ խնդիրներ է լուծելու, չկողմնարոշվածներն էլ ընկալեն, թե Հայաստանում ինչ գործընթացներ են լինելու։
Գնանք միասին ու կհաղթենք. Վազգեն Մանուկյանը ժողովրդին հորդորում է գնալ իր հետևից
«Իշխանությունը ձգտում է մարդկանց ներշնչել, թե գալու են հները, որ սա ընդամենը կռիվ է պաշտոնի համար, գալու են ու շարունակեն թալանը։ Փորձում են կրկին աշխատացնել 2,5 տարվա վաղեմության մեխանիզմները, ինչն իրոք ազդում է որոշակի քանակի մարդկանց վրա։ Սա նաև ընդդիմության բացթողումն է, որը պետք է ավելի անմիջականորեն շփվի մարդկանց հետ` բացատրելով, որ սա իշխանության հարց չէ»,– նշեց քաղաքագետը։
Դանիելյանի համոզմամբ` Մանուկյանի գլխավորած ընդդիմությունը պետք է նաև փորձի վերականգնել փլուզված քաղաքական համակարգը, ներկայացնի ծրագիր, որպեսզի մարդիկ հասկանան, թե ում օգտին են քվեարկելու, մինչդեռ քաղաքական դաշտն այդ առումով դրան դեռ պատրաստ չէ։