ԵՐԵՎԱՆ, 8 դեկտեմբերի - Sputnik. Հայաստանի արտաքին գործերի նախարար Արա Այվազյանը Ֆրանսիայի արտաքին գործերի նախարար Ժան-Իվ լը Դրիանի հետ համատեղ մամուլի ասուլիսի ժամանակ խոսել է գերիներից և մշակութային կոթողներից։ Տեղեկությունը հայտնում է ԱԳՆ մամուլի խոսնակ Աննա Նաղդալյանը։
Նախարարը խստագույնս դատապարտել է Ադրբեջանի զինվորականների կողմից հայ ռազմագերիների նկատմամբ անմարդկային վերաբերմունքի դրսևորման դեպքերը։
«Դրանք ոչ միայն չեն դատապարտվում Ադրբեջանի բարձր ղեկավարության կողմից, այլև արժանանում են հասարակական աջակցության», – ասել է Այվազյանը։
Այվազյանը նաև նշել է Ադրբեջանի կողմից թիրախավորվող մշակութային կոթողներից։
«Հայատյացության դրսևորումների թիրախ են դառնում նաև Արցախի՝ ադրբեջանական օկուպացիայի տակ հայտնված տարածքներում հայկական բազմաթիվ միջնադարյան մշակութային, կրոնական կոթողները, որոնք ադրբեջանական կողմը կամ փորձում է ոչնչացնել, սրբապղծել, կամ էլ՝ փոխել նրանց ինքնությունը», – ասել է նախարարը։
Թուրքիան պետք է ձեռք բերի Հայաստանի վստահությունը. Արա Այվազյան
Նա նշել է, որ գործընկերոջ հետ փոխանակել են մտքեր` միջազգային կազմակերպությունների միջոցով կրոնական-մշակութային կոթողների պահպանման ուղղությամբ։
Հիշեցնենք, որ Հայաստանի նորանշանակ արտգործնախարարն իր առաջին արտասահմանյան այցն իրականացրեց Մոսկվա՝ դեկտեմբերի 6–ին և 7-ին, որտեղ բանակցություններ վարեց ՌԴ ԱԳ նախարար Սերգեյ Լավրովի հետ:
Դեկտեմբերի 8-ին Արա Այվազյանը երկօրյա աշխատանքային այցով մեկնել է Ֆրանսիա։