Քաղաքական իրավիճակն անորոշ է և անկայուն, ընդ որում` անկայունությունն արդեն 2,5 տարի է, ինչ մեզ մոտ դարձել է ավանդական, իսկ անորոշ է, քանի որ հայտնի չէ, թե ապագայի ինչ տեսլական ունեն իշխանությունն ու ընդդիմությունը։ Sputnik Արմենիայի հետ զրույցում այսպիսի տեսակետ հայտնեց քաղաքագետ Նորայր Դունամալյանը։
Նշենք, որ դեկտեմբերի 5-ին կայացած հանրահավաքից ու երթից հետո ընդդիմադիր ուժերի ստեղծած Հայրենիքի փրկության շարժումը հայտարարել է, որ Նիկոլ Փաշինյանը պետք է մինչև դեկտեմբերի 8-ի ժամը 12-ը հրաժարական տա, այլապես բողոքի ակցաները կընդգրկեն ողջ հանրապետությունը։
Նորայր Դունամալյանի դիտարկմամբ` ներկայում ավելի շատ ընթանում է քաղաքական օրակարգերի պատերազմ. Վազգեն Մանուկյանին որպես միասնական ընդդիմության անցումային վարչապետ առաջադրելուց հետո ընդդիմությունը պետք է ներկայացնի կոնկրետ քայլերի հերթագայություն տարբեր ուղղություններով։
Ընդդիմությունը հայտարարեց, որ իրենց վարչապետի թեկնածուն Վազգեն Մանուկյանն է
«Մյուս կողմից` իշխանությունը ոչ թե խուսափում է պատասխանատվությունից, այլ փորձում է պատերազմի արդյունքների համար պատասխատավություն ստանձնելով` իրավիճակը շտկել, թեև պարզ չէ, թե ինչպես է շտկելու, եթե ճանապարհային քարտեզը դա ցույց չի տալիս, և դրանում ավելի շատ վերացական դրույթներ են։ Այսինքն` կա երկու օրակարգ, և միայն կառուցողական մոտեցումը կլիներ այն, որ վարչապետի կողմից ներկայացված ճանապարհային քարտեզի վերջում նշվեր հրաժարականի և արտահերթ ընտրություններ անցկացնելու կոնկրետ ժամկետներ»,– նշեց քաղաքագետը։
Նրա կարծիքով` թեև հասարակությունը պատերազմից հետո դեռ գտնվում է շոկային վիճակում և չի հասկանում, թե ինչ է պատահել, այդուհանդերձ, եղածը վերաիմաստավորելու համար անհրաժեշտ է, որ քաղաքական ուժերը ներկայացնեն հստակ օրակարգ։ Քաղաքագետը վկայակոչեց սոցիոլոգիական տարբեր հետազոտությունների արդյունքները, որոնց համաձայն` հասարակության գրեթե կեսը դեռ սատարում է Նիկոլ Փաշինյանին, հետևաբար, նման պայմաններում իշխանություն–ընդդիմություն պայքարը բերելու է հասարակության պառակտման, եթե կողմերը չգնան փոխզիջման։
Դունամալյանն առկա իրավիճակը համեմատեց 2011 և 2008 թվականներին առաջացած իրավիճակների հետ` նշելով, որ թեև պայմանները տարբեր են, բայց քաղաքական դիսկուրսն ընթանում է նույն կերպ, նույն տրամաբանությամբ։
Սահմանադրական դատարանն ընդունել է ընդդիմության դիմումը. նիստը կկայանա փետրվարին
Քաղաքագետի համոզմամբ` հակամարտության արդյունքում կարող են առանձին խմբավորումների միջև գրանցվել բախումներ, բայց Հայաստանում քաղաքացիական պատերազմ չի լինի։