Հայաստանի մի խումբ մտավորականներ այսօր նախաձեռնել էին երթ` Ադրբեջանում գտնվող հայ գերիների վերադարձի խնդիրները լուծելու պահանջով։ Հայտնի մարդկանց միացել էին նաև հասարակ քաղաքացիները, գերիների և անհայտ կորածների հարազատները։ Նրանք մեր հերոս տղաների լուսանկարներով Երևանի Ազատության հրապարակից քայլեցին դեպի Հայաստանում Ռուսաստանի Դաշնության դեսպանություն և նամակ հանձնեցին ՀՀ–ում ՌԴ դեսպան Սերգեյ Կոպիրկինին։
Նամակում ասված է, որ թեև Արցախի վերաբերյալ եռակողմ հայտարարությունից հետո 20 օր է անցել, մի քանի տասնյակ մարդիկ շարունակում են անհայտ կորած կամ գերեվարված մնալ։
Ի դեպ, եռակողմ հայտարարության 8–րդ կետի պահանջն էր գերիների, զոհերի մարմինների փոխանակում, նաև պետք է կատարվեին անհայտ կորածների փնտրման աշխատանքներ։ Սակայն հայտարարությունում նշված չեն դրանց իրականացման ժամկետները։ «Հարգելի պարոն Կոպիրկին, դիմում ենք Ձեզ խնդրելով անձամբ միջամտել գործընթացին, ինչպես նաև մեր խնդրանքը փոխանցել ՌԴ ղեկավարությանը։ Վստահ ենք, որ նման միջամտությունը կարագացնի մեր գերիների վերադարձը հայրենիք», - ասված է նամակում։
Նշենք, որ երեկ` նոյեմբերի 28–ին, Երևանի «Մոսկվա» կինոթատրոնի մոտ ևս կայացել է հայաստանյան մտավորականների հանրահավաքը` գերիների և անհայտ կորածներին խնդրով անհապաղ զբաղվելու պահանջով։