ԵՐԵՎԱՆ, 27 նոյեմբերի – Sputnik. Վրաստանի վարչապետի հատուկ ներկայացուցիչ Զուրաբ Աբաշիձեն և Ռուսաստանի սենատոր Գրիգորի Կարասինը այսօր կայացած հանդիպմանը քննարկել են Արցախի վերաբերյալ եռակողմ հայտարարությունը։ Ինչպես հայտնում է ՌԴ ԱԳՆ կայքը, բանակցությունները կայացել են ռուս-վրացական ոչ պաշտոնական երկխոսության մեխանիզմի շրջանակում: Դրանց մասնակցել են երկու երկրների արտաքին գործերի և տրանսպորտի նախարարությունների ներկայացուցիչները։
Տարածաշրջանային խնդիրների քննարկման համատեքստում կողմերը կարևորել են Արցախի վերաբերյալ եռակողմ հայտարարությունը, որը թույլ է տվել դադարեցնել ռազմական գործողությունները և պայմաններ ստեղծել Լեռնային Ղարաբաղի հակամարտության գոտում իրավիճակի կայունացման համար:
«Նշված եռակողմ պայմանավորվածությունների իրականացումը (մասնավորապես` տրանսպորտային հաղորդակցությունների և տնտեսական կապերի ապաշրջափակման մասին) նոր հնարավորություններ է ստեղծում անդրկովկասյան բոլոր պետությունների, այդ թվում՝ Վրաստանի համար»,-ասվում է հաղորդագրության մեջ։
Բացի այդ, բանակցությունների ընթացքում հանգամանալից կարծիքներ են փոխանակվել երկկողմ հարաբերությունների մի շարք գործնական հարցերի շուրջ։
«Տեղի է ունեցել ռուս-վրացական առևտրատնտեսական կապերի ուսումնասիրություն։ Հակառակ նոր կորոնավիրուսային համավարակի հետ կապված քաղաքական կոնյուկտուրային և դժվարություններին, Ռուսաստանը շարունակում է երկրորդ նշանակությամբ արտաքին առևտրային գործընկերը մնալ Վրաստանի համար և վրացական արտադրանքի` առաջին հերթին՝ գինու խոշոր ներկրողն է»,-նշվում է հաղորդագրության մեջ:
Աբաշիձեն ու Կարասինը քննարկել են նաև երկկողմ հիմքի վրա բեռների փոխադրումների թույլտվությունների քանակի ավելացման հնարավորությունները:
«Անդրադարձ է կատարվել երկու երկրների միջև ավիահաղորդակցության վերականգնման հեռանկարներին՝ հաշվի առնելով անցյալ տարվա հուլիսին դեպի Վրաստան օդային ուղևորափոխադրումների ժամանակավոր արգելքը: Դրա պայմանները լավ հայտնի են՝ Վրաստանում հակառուսական դրսևորումների դադարեցում և ՌԴ քաղաքացիների համար անվտանգության սպառնալիքների անհետացում։ Բացի այդ, երկու երկրներում էլ պետք է կարգավորվի COVID-19 համավարակի հետևանքով առաջացած սանիտարահամաճարակաբանական իրադրությունը»,-ասվում է հաղորդագրության մեջ։
Կողմերը պայմանավորվել են հաջորդ հանդիպումն անցկացնել 2021թ․-ի առաջին եռամսյակում, և եթե սանիտարահամաճարակային իրավիճակը թույլ տա, ապա առկա ձևաչափով՝ Պրահայում։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։
Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։