ԵՐԵՎԱՆ, 23 նոյեմբերի — Sputnik. Ռուսաստանի պաշտպանության նախարարության Միջազգային հակաականային կենտրոնի ստորաբաժանումներն Արցախ են ուղևորվել՝ ականազերծման աշխատանքներ իրականացնելու համար։
ՌԴ Պաշտպանության նախարարության մամուլի ծառայությունը հայտնում է, որ Ռուսաստանի Տիեզերաօդային ուժերի Ռազմատրանսպորտային ավիացիայի Ան-124, Իլ-76 և Տու-154 ինքնաթիռները Մոսկվայի մոտակայքի Չկալովսկի օդանավակայանից ուղարկել են ՌԴ ՊՆ Միջազգային հակաականային կենտրոնի մասնագետներին, տեխնիկան ու սպառազինությունը, նաև ծառայողական շներին՝ Լեռնային Ղարաբաղում խաղաղապահ գործողության գոտում խնդիրներ լուծելու համար։
Նշվում է, որ Երևանի օդանավակայան է հասցվել ավելի քան 100 զինծառայող, 13 միավոր ռազմական ու հատուկ տեխնիկա, այդ թվում նաև «Ուրան-6» ականազերծման ռոբոտատեխնիկական համալիրներ, զրահափոխադրիչներ ու զրահամեքենաներ։
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
Անձնակազմը կանցնի Երևան-Գորիս-Ստեփանակերտ երթուղիով ու նշանակման կետ ժամանելուն պես կսկսի հակամարտության հետևանքով առավել տուժած շրջաններում ինժեներական հետախուզության խնդիրների լուծման, ականազերծման ու պայթյունավտանգ իրերի ոչնչացմանն ուղղված աշխատանքներ իրականացնել։