ԵՐԵՎԱՆ, 20 նոյեմբերի – Sputnik. Ռուսաստանի արտակարգ իրավիճակների նախարարությունը նախատեսում է մեծացնել իր խմբավորումը Լեռնային Ղարաբաղում։ Մասնավորապես, գերատեսչությունը պատրաստվում է հոգեբաններ ուղարկել Արցախ։ Այդ մասին ուրբաթ օրը լրագրողներին հայտնել Է ՌԴ ԱԻՆ միջազգային գործունեության դեպարտամենտի ղեկավար Վլադիմիր Սոլովյովը։
«Խմբավորման ավելացում է տեղի ունենալու։ Նախատեսվում է հոգեբաններ ուղարկել, հոգեբաններ են աշխատելու»,-ասել է նա։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Հավելենք, որ նոյեմբերի 10-ից Ռուսաստանից Հայաստան իրականացվել է խաղաղապահների ու ռազմական տեխնիկա տեղափոխող ինքնաթիռների 226 թռիչք։