ԵՐԵՎԱՆ, 10 նոյեմբերի - Sputnik. Իրանին բավարարել է Ռուսաստանի, Ադրբեջանի և Հայաստանի ղեկավարների՝ Լեռնային Ղարաբաղում ռազմական գործողությունների լիակատար դադարեցման մասին հայտարարության բովանդակությունը: Իրանի նախագահի մամուլի ծառայության հաղորդմամբ՝ նման կարծիք է հայտնել նախագահ Հասան Ռոհանին։
«Մենք բավարարված ենք ռազմական գործողությունների դադարեցման և դիվանագիտական կարգավորման գործընթացի մեկնարկի մասին որոշմամբ», - ասել է Իրանի նախագահը:
Ռոհանին հավելել է, որ տարածաշրջանում կայուն անվտանգությունը հնարավոր է միայն փոխգործակցության և համագործակցության հաշվին:
Twitter-ի իր միկրոբլոգում գրառում է արել նաև Իրանի նախագահի աշխատակազմի ղեկավար Մահմուդ Վաեզին։
«Մենք կարծում ենք, որ բանակցությունները և քաղաքական որոշումը կարող են վերջ դնել այդ դարավոր ճգնաժամին, եթե հակամարտության երկու կողմերը պահպանեն իրենց հավատարմությունը միջազգային նորմերին՝ ներառյալ երկրների տարածքային ամբողջականությունը և նրանց քաղաքացիների քաղաքացիական իրավունքները»,- գրել է Վաեզին իր միկրոբլոգում։
Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար ծանր, չափազանց ծանր որոշում է կայացրել:
Նա նշել էր, որ Ռուսաստանի և Ադրբեջանի նախագահների հետ ղարաբաղյան պատերազմը նոյեմբերի 10-ի ժամը 01.00-ից դադարեցնելու հայտարարություն է ստորագրել, շեշտելով, որ այդ որոշումը կայացրել է ռազմական իրադրության խորը վերլուծության և այդ իրադրությանն ամենալավ տիրապետող մարդկանց գնահատականի արդյունքում, նաև հիմնվելով այն համոզմունքի վրա, որ ստեղծված իրավիճակում սա հնարավոր ամենալավ հանգուցալուծումն է:
Փաշինյանի հայտարարությունից հետո բազմաթիվ մարդիկ շարժվել են դեպի Հանրապետության հրապարակ, մի խումբը ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Կրակը դադարեցվում է. ինչի տակ են ստորագրել Փաշինյանը, Պուտինն ու Ալիևը
Նոյեմբերի 10-ի ժամը 13։30-ի դրությամբ` հայկական կողմից զոհվել են 1302 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Ո՞ւր է այդ...». քաղաքացիները ջարդել են դռներն ու մտել ՀՀ կառավարության շենք. տեսանյութ