ԵՐԵՎԱՆ, 8 նոյեմբերի - Sputnik. Այս գիշեր թշնամին շարունակել է հրթիռակոծել Արցախի Հանրապետության մայրաքաղաք Ստեփանակերտը։ Արցախի արտակարգ իրավիճակների պետական ծառայությունը Facebook-ի պաշտոնական էջում լուսանկարներ է հրապարակել և գրառում կատարել։
«Սեպտեմբերի 27-ից սկսած` խաղաղ բնակչությանը թիրախավորելու` թշնամու ձեռագիրը չի փոխվում»,- նշված է գրառման մեջ։
Իսկ հրապարակված լուսանկարներում երևում են մայրաքաղաքի ուղղությամբ արձակված հեռահար հրթիռների հետևանքները։ Լրիվ կամ մասամբ ավերվել են տներ, այրվել ավտոմեքենաներ, վնասվել են բազմաբնակարան շենքերի, քաղաքացիական տարբեր շինությունների պատուհանները։ Ամենուր կոտրված ապակիներ են, տանիքներից պոկված թիթեղներ, արձակված հրթիռների մնացորդներ։
Հիշեցնենք՝ այս գիշեր 2:00-ի սահմաններում Արցախի ԱԻՊԾ-ն տեղեկացրեց, որ Ստեփանակերտը շարունակում է թշնամու թիրախում լինել, քաղաքում մի քանի անգամ օդային տագնապի ազդանշան է միացվել։ Վաղ առավոտյան հաղորդվեց, որ գիշերն անհանգիստ ու լարված է եղել հատկապես մայրաքաղաք Ստեփանակերտում. քաղաքը պարբերաբար հրթիռակոծվել է։
Հեռահար հրթիռների 8 հարված է հասցվել քաղաքի բազմաբնակարան շենքերի, բնակելի թաղամասերի, հանրային նշանակության օբյեկտների և քաղաքացիական այլ ենթակառուցվածքների ուղղությամբ։
Նախնական տեղեկություններով՝ տուժածներ չկան, իսկ ավերածությունները շատ են։ Մյուս բնակավայրերում պահպանվել է հարաբերական հանգիստը։ Արցախի արտակարգ իրավիճակների պետական ծառայությունն առավոտյան սպասված լուր հաղորդեց՝ Շուշին շարունակում է անառիկ մնալ։ Գիշերվա ընթացքում ՊԲ ստորաբաժանումները բազմաթիվ հարձակումներ են հետ մղել և մեծ կորուստներ պատճառել թշնամուն տարբեր ուղղություններում։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 6-ի ժամը 19։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 262 ԱԹՍ-ից, 16 ուղղաթիռից, 25 ինքնաթիռից, 749 զրահատեխնիկայից, 6 ՏՕՍ-ից, 7510 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում