Արցախի Հանրապետության մայրաքաղաք Ստեփանակերտը պատերազմի հենց առաջին օրերից թշնամու հրթիռահրետանային հարվածների թիրախում հայտնվեց։ Քաղաքում տասնյակ խաղաղ բնակիչներ են զոհվել, վիրավորվել, հարյուրավոր շենք-շինություններ, հանրային նշանակության օբյեկտներ են ավերվել։ Ստեփանակերտում օրեր շարունակ օդային տագնապի ազդանշանը չի լռում։ Արցախի Հանրային հեռուստաընկերությունը հուզիչ տեսանյութ է պատրաստել, որն առանց մեկնաբանությունների, միայն տեսաշարով ցույց է տալիս՝ ինչպիսին էր քաղաքը պատերազմից առաջ ու հիմա։
Գեղեցիկ, մաքուր, լուսավոր, գունեղ քաղաքի շատ հատվածներում հիմա միայն ավերակներ են։ Երբեմնի բարեկարգ փողոցներում հիմա վնասված ավտոմեքենաներ են, կոտրված ապակիներով խանութներ, առանց պատերի ու տանիքի մնացած կամ էլ լրիվ հողին հավասարված տներ և այլն։ Աշխույժ, մարդաշատ, կյանքով լի քաղաքը հիմա դատարկ է թվում. ավերակներում վախեցած կենդանիներն են շրջում։ Կադրերից մեկում Ստեփանակերտի շուկան է, որտեղ մոտ ամիս ու կես առաջ կյանքը եռում էր։ Մի կողմում կանայք ժենգյալով հաց էին թխում, մյուս կողմում արցախյան համեղ թթուներն էին վաճառվում, ուրախ խոսք ու զրույց, կոլորիտ... Հիմա Ստեփանակերտի շուկան դատարկ է ու ավերված. հրթիռային հարվածներից մեկը հենց շուկան էր թիրախավորել։
Նշենք, որ այսօր ևս շարունակվել է մայրաքաղաքի թիրախավորումը, հերթական հրթիռակոծության հետևանքով տներից մեկում տատ ու թոռներ են զոհվել։