Քաղաքագետ Սուրեն Սուրենյանցի գնահատմամբ՝ միջազգային հանրության արձագանքը բազմաշերտ է, չի կարելի միանշանակ գնահատականներ տալ: Բոլորն արձանագրել են, որ Ադրբեջանն ու Թուրքիան Սիրիայից և Լիբիայից վարձկաններ են բերել Արցախ, և այս հարցում հայկական ջանքերը արդյունք են տվել, որովհետև այդպիսի արձանագրումներ և դատապարտումներ լսել ենք թե՛ Ռուսաստանից, թե՛ Ֆրանսիայից, թե՛ ԱՄՆ-ից, թե՛ մեր հարևան Իրանից, և այս հարցում խնդիր չկա։ Ամբողջ աշխարհը գիտակցում է, որ գործ ունենք հիբրիդային պատերազմի հետ, որտեղ ներգրավված են վարձկանները:
«Սակայն միջազգային արձագանքի կարևոր բաղադրիչը նաև կարգավորման ձևաչափի, բովանդակության մասին հնչած կարծիքներն են. այս հարցում մեր դիվանագիտության արդյունքերը մեծ չեն, որովհետև առայժմ Մոսկվայում հնչում է 5+2 տարբերակը։ Ստացվում է՝ պատերազմը ոչինչ չի փոխել, ավելին՝ արագացրել է դիսկուսը»,-նշում է Սուրենյանը:
Ինչ վերաբերում է մյուս երկրներին, ապա Իրանն առաջարկում է միջնորդական ձևաչափի փոփոխություն և միջնորդների կարգավիճակում տեսնում է Ռուսաստանին, Թուրքիային և Իրանին, բացի այդ խոսում է դեօկուպացիայի անհրաժեշտության մասին, ինչը նույնպես այնքան էլ ներդաշնակ չէ մեր օրակարգի հետ: Թուրքիայի առաջարկները պարզ են՝ սիրիական մոդելի կիրառում մեր հակամարտության գոտում, ինչն ըստ քաղաքագետի՝ միանգամայն անընդունելի է հայակական կողմի համար:
«Այսինքն՝ զուտ ղարաբաղյան հիմնահարցի կարգավորման ձևաչափի և բովանդակության մասով չեմ կարող ասել, որ մեր դիվանագիտությունը միջազգային հանրության հնչեցրած տեսակետների հարցում հասել է մեծ հաջողության»,- ասում է Սուրենյանցը:
Ըստ քաղաքագետի՝ այստեղ աշխատելու շատ մեծ դաշտ կա: Եվ այս հարցում Սուրենյանցը բավարար չի համարում ինչպես մինչ պատերազմը, այնպես էլ պատերազմից հետո գործադրված դիվանագիտական ջանքերը:
Հիշեցնենք՝ Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել է, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
Հայտնի է, որ սիրիացի ահաբեկիչներին 1,5-2 հազար դոլար են խոստանում ռազմական գործողություններին 1 ամիս մասնակցելու համար։ Այս տեղեկությունը հաստատել են ոչ միայն հայաստանյան և ղարաբաղյան իշխանությունները, միջազգային ԶԼՄ-ներն ու արտասահմանյան իրավապաշտպան կազմակերպությունները, այլև Սիրիայի, Ֆրանսիայի, Ռուսաստանի, ԱՄՆ–ի և այլ երկրների իշխանությունների ներկայացուցիչներ։
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Նշենք, որ հայկական կողմին արդեն հաջողվել է գերեվարել 2 սիրիացի վարձկան–ահաբեկչի։ Նրանցից առաջինին` Մեհրեդ Մուհամմադ Ալշխերին, բռնել են հոկտեմբերի 30–ին, իսկ երկրորդին` Յուսեֆ Էլ Աբեդ Էլ Հաջիին, հայ զինծառայողները գերեվարել են նոյեմբերի 1–ին։ Նրանք արդեն ցուցմունք են տվել և պատմել իրենց հավաքագրելու պայմանների մասին։