ԵՐԵՎԱՆ, 4 նոյեմբերի — Sputnik. ՀՀ արդարադատության նախարար Ռուստամ Բադասյանն առաջնագիծ մեկնելու պլաններ դեռ չունի։ Այս մասին նա հայտնեց Ազգային ժողովում լրագրողների հետ ճեպազրույցում ժամանակ։
«Երբ անհրաժեշտությունը լինի, ես պատրաստ եմ հայրենիքի պաշտպանությանը մասնակցել այն ծավալով, ինչ ծավալով անհրաժեշտ է. որևէ խնդիր չկա։ Իմ տեղակալն առաջնագծում է, ինչպես նաև քրեակատարողական ծառայողներ ունենք, որ զինվորագրվել են։ Այս առումով մենք մեր ծրագրերն ունենք», - ասաց նախարարը։
Հարցին, թե արդյո՞ք առաջնագիծ մեկնելու ցանկություն ունեցող կալանավորներին չեն պատրաստվում ընդառաջ գնալ և ազատ արձակել` Բադասյանը պատասխանեց, որ այդ առումով որոշակի պրոցեսներ կան։ Արդարադատության նախարարությունը կողմ է ցանկացած անձի` հայրենիքը պաշտպանելու ազնիվ մղմանը, սակայն այդ հարցը դատախազության տիրույթում է։
Նշենք, որ ՀՀ վարչապետ Նիկոլ Փաշինյանը կոչով էր հանդես եկել, որպեսզի համայնքապետները, գյուղապետներն ու ղեկավար անձինք փոքր ջոկատ կազմեն ու մեկնեն Արցախ։ Նրա կոչին արդեն իսկ արձագանքողներ կան` Երևանի քաղաքապետ Հայկ Մարությանն, օրինակ, քաղաքային ջոկատ է պատրաստվում կազմել, որը գլխավորելու է հենց ինքը։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 2-ի ժամը 19։00-ի դրությամբ` հակառակորդի կրակոցների հետևանքով Արցախում զոհվել են 1177 զինծառայողներ։ Քաղաքացիական անձանց շրջանում կա 46 զոհ ու 142 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7095 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 251 անօդաչու սարք, 16 ուղղաթիռ, 25 ինքնաթիռ, 685 զրահատեխնիկա, 6 ՏՈՍ համակարգ։
Ում պետք չէ ռազմաճակատ տանել. պատմության դասերը
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Բառերը քիչ են, որ նկարագրեմ». ռազմաճակատից եկած հոր ու նորածին դստեր 1–ին հանդիպումը