ԵՐԵՎԱՆ, 2 նոյեմբերի – Sputnik. Ադրբեջանի զինված ուժերի կողմից Դավիթ Բեկ համայնքի հրթիռակոծման դեպքի առթիվ ՀՀ զինվորական դատախազությունում հարուցվել է քրեական գործ։ Տեղեկությունը հայտնում է ՀՀ Գլխավոր դատախազությունը։
Նշենք, որ Հայաստանի Հանրապետության նկատմամբ իրականցված ադրբեջանական ագրեսիայի հետևանքով մեկ քաղաքացիական անձ մահացել է, երկուսը վիրավորվել։
Հրթիռակոծության հետևանքով բեկորային վնասվածքներ են ստացել Դավիթ Բեկ բնակավայրի բնակիչ երկու կանայք, իսկ Կապան համայնքի բնակիչ Դավիթ Յուրիկի Հովհաննիսյանը (ծնված 1976թ.) մահացել է։
Վերջինս զբաղված է եղել իր առօրյա գործերով, եղել է քաղաքացիական հագուստով և գտնվել է իր մեքենայի ղեկին։
«Դեպքի առթիվ հարուցվել է քրգործ ՀՀ քրեական օրենսգրքի 384-րդ հոդվածի 2-րդ մասով (ագրեսիվ պատերազմ սանձազերծելը կամ վարելը), 390-րդ հոդվածի 1-ին մասի 1-ին կետով (միջազգային մարդասիրական իրավունքի նորմերի լուրջ խախտումները զինված ընդհարումների ժամանակ,սպանությունը) 3-րդ մասի 1-ին (քաղաքացիական բնակչության կամ առանձին քաղաքացիական անձանց վրա հարձակումը) և 2-րդ կետերով (ոչ ընտրովի բնույթի հարձակումը, որը վնասում է քաղաքացիական բնակչությանը) հարուցվել է քրեական գործ»,-նշված է հաղորդագրության մեջ։
Մեր դիրքերի դիմաց թողել են մոտ 15-16 դիակ ու փախել. Արծրուն Հովհաննիսյան
Ադրբեջանի Հանրապետության զինված ուժերի կողմից շարունակում են դիտավորությամբ թիրախավորել Հայաստանի Հանրապետության տարածքում գտնվող բնակավայրերն ու քաղաքացիական անձինք։
Հիշեցնենք՝ այսօր ժամը 18։10-ի սահմաններում Ադրբեջանի զինված ուժերի կողմից հերթական անգամ մեծ տրամաչափի հրթիռահրետանային միջոցներով, համազարկային կրակի ռեակտիվ համակարգերով, միջազգային կոնվենցիաներով արգելված զինատեսակներով ինտենսիվ հարվածներ են հասցվել ՀՀ Կապան համայնքի Դավիթ Բեկ բնակավայրին, վերջինիս բնակիչներին, քաղաքացիական ենթակառուցվածքներին, ինչի հետևանքով հասցվել են մեծ վնասներ, ավերվել են բազմաթիվ բնակելի տներ։ Հարկ է ընդգծել, որ նշված բնակավայրում որևէ ռազմական օբյեկտ տեղակայված չէ։