ԵՐԵՎԱՆ, 22 հոկտեմբերի - Sputnik. Արցախցի կանայք ու երեխաները բողոքի ակցիա են անում Հայաստանում ԱՄՆ–ի դեսպանատան դիմաց և արդարություն պահանջում։ Նրանք կոչ են անում օր առաջ դադարեցնել Ադրբեջանի ագրեսիան, որին բացահայտ սատարում է Թուրքիան։
«Եկել ենք պահանջելու, որ ԱՄՆ–ն որպես ՆԱՏՕ–ի անդամ պատժամիջոցներ կիրառի Թուրքիայի նկատմամբ և վերջ դնի այդ երկրի միջամտությանը արցախա–ադրբեջանական սահմանագոտում տիրող իրավիճակին։ ԱՄՆ–ն, հանդիսանալով ԵԱՀԿ Մինսկի խմբի համանախագահող երկիր, պետք է անի ամեն ինչ մեր երկրում խաղաղություն հաստատելու համար։ Խնդրում ենք, պահանջում ենք, որ դեսպանը դուրս գա ու լսի մեզ»,–ասաց ցուցարարներից մեկը։
Մեկ ուրիշն էլ նշեց, որ իրենք չեն եկել ԱՄՆ–ին ասելու, որ պաշտպանի իրենց հողերն ու տները, դա հայ քաջորդիների գործն է, բայց ԱՄՆ–ն որպես ԵԱՀԿ Մինսկի խմբի անդամ պարտավորություններ ունի և պատասխանատվություն է կրում այս ամենի համար։
Փաստացի Թուրքիան Արցախում պատերազմ է մղում հայերի դեմ ԱՄՆ–ի անմիջական ու հանցավոր լռության պայմաններում։
«Գաղտնիք չէ, որ Թուրքիան այսօր զինում է Ադրբեջանին, որն էլ հենց ամերիկյան զինատեսակներով կռիվ է մղում Արցախի դեմ։ Ըստ ԱՄՆ–ի օրենսդրության զենքի մասին օրենքի` որևէ ամերիկյան զինատեսակ իրավունք չունի առանց ԱՄՆ թույլտվության հայտնվել մեկ ուրիշ երկրի տարածքում։ Փաստացի Թուրքիան խախտում է ԱՄՆ–ի օրենսդրությունը, բայց ԱՄՆ–ն լռում է»,–ասաց ակցիայի ղեկավարներից մեկը։
Նա նաև հավելեց, որ ԱՄՆ–ն մարդասիրական օգնության շրջանակներում ֆինանսավորում է Արցախին, և այդ գումարը ծախսվում է ականազերծումների համար։ Բայց այս տարի քննարկվում է, որ այդ գումարները չփոխանցեն, այլ գումար տան միայն խաղաղասիրական ծրագրերի շրջանակում։
«Ինձ, իմ սերնդակիցներին, որ երեք պատերազմ ենք տեսել ու խաղաղություն ենք ուզում, եկել են խաղաղասիրություն սովորեցնեն։ Այդ մենք կարող ենք աշխարհին խաղաղություն սովորեցնել»,–ասաց նա։
Ի վերջո ԱՄՆ դեսպանատան աշխատակիցներից մեկը դուրս եկավ շենքից և հայտնեց, որ ԱՄՆ դեսպանատան դիվանագիտական ներկայացուցիչներից մեկը կընդունի ակցիայի կազմակերպիչներին։
Ակցիայի մասնակիցները քիչ անց դուրս եկան շենքից և ասացին, որ իրենց նամակը հանձնել են դիվանագիտական ներկայացուցիչներից մեկին և ԱՄՆ դեսպանի հետ հանդիպում պահանջել, այլապես դեսպանատան մոտից մի քայլ անգամ չեն հեռանա ու պետք լինի վրաններում կքնեն։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 21-ի ժամը 16:40-ի դրությամբ` հակառակորդի կրակոցների հետևանքով զոհվել են 834 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը