ԵՐԵՎԱՆ, 19 հոկտեմբերի – Sputnik. ՌԴ արտաքին գործերի նախարար Սերգեյ Լավրովը հայտնել է, որ ակտիվ աշխատանք է տարվում Ղարաբաղում կրակի դադարեցման վերահսկողության մեխանիզմի ուղղությամբ, և ինքը հույս ունի, որ շուտով արդյունք կլինի։
«Երկու փաստաթղթերից հետո, որոնք ընդունվել են, բայց տեղում իրավիճակն արմատապես փոխելու հիմք չեն դարձել, մենք համոզվել ենք, որ որպեսզի հրադադարի ռեժիմն աշխատի, անհրաժեշտ է ստեղծել հրադադարի ռեժիմի պահպանման վերահսկողության մեխանիզմ», - ասել է Լավրովը Եվրոպայի խորհրդի գլխավոր քարտուղար Մ.Պեյչինովիչ-Բուրիչի հետ հանդիպումից հետո՝ համատեղ մամուլի ասուլիսի ժամանակ:
Նախարարն ընդգծել է, որ այդ ուղղությամբ ակտիվորեն աշխատում է նախևառաջ Ռուսաստանի պաշտպանության նախարարությունը՝ «Ադրբեջանից և Հայաստանից գործընկերների հետ»։ Լավրովը հույս է հայտնել, որ այդպիսի մեխանիզմը կհամաձայնեցվի ամենամոտ ժամանակում։
Խոսելով առկա խնդիրների մասին, ՌԴ ԱԳ նախարարը նշել է, որ անհրաժեշտ է արագացնել քաղաքական կարգավորման ջանքերը։ Նա ընդգծել է, որ կան հանգամանալից, ծավալուն աշխատանքներ, որոնք ԵԱՀԿ Մինսկի խմբի համանախագահները քննարկել են կողմերի հետ. դրանցում կան բոլոր հարցերի պատասխանները:
«Այս պատմական պահին մենք պետք է կողմերին դրդենք համաձայնեցնել առանցքային դրույթները, որոնք թույլ կտան ավելի երկար ժամանակով կայունացնել իրավիճակն այս տարածաշրջանում, ապաշրջափակել տնտեսական և տրանսպորտային կապերը, ապահովել թե՛ Ղարաբաղի, թե՛ այստեղ գտնվող այլ տարածքների հուսալի անվտանգությունը»,-եզրափակել է Լավրովը։
«Երրորդ անգամ շատ ավելի կոշտ է լինելու». Բաբայանը` հրադադարի ու Ռուսաստանի մասին
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակում էր հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն հոկտեմբերի 18–ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք կան զոհեր ու վիրավորներ: ՀՀ ՊՆ մամուլի խոսնակ Շուշան Ստեփանյանն էլ հայտնեց, որ հակառակորդը հարձակում է սկսել ձեռնտու դիրքեր գրավելու նպատակով։